जामनेर ते सोयगाव वनक्षेत्रात रासायनिक ड्रम माफिया सक्रिय; पर्यावरण रक्षकांचे प्रदूषण नियंत्रण मंडळाला पत्र

तोंडापूरच्या नागरिकांचा वनविभागावर आर्थिक गैरव्यवहाराचा आरोप

छत्रपती संभाजीनगर, दि. २० जून २०२६ (प्रतिनिधी): अजिंठा वनविभागाच्या परिक्षेत्रांतर्गत येणाऱ्या तोंडापूर धरणाच्या मागील राक्सा नियत क्षेत्रातील कक्ष क्रमांक ५०५ 'ड' मध्ये सापडलेले घातक रसायनांचे २३ ड्रम अचानक गायब झाल्याने वनविभागाची भूमिका संशयाच्या भोवऱ्यात सापडली आहे. दि. १६ जून रोजी सायंकाळी पाच वाजेच्या सुमारास हे ड्रम वनविभागाच्या हद्दीत आढळून आले होते. मात्र, संबंधित वनविभागाच्या कर्मचाऱ्यांनी वरिष्ठ अधिकाऱ्यांना कोणतीही पूर्वकल्पना न देता हे ड्रम शेजारच्या शेतकऱ्यांच्या हवाली केले. धक्कादायक बाब म्हणजे, दि. १८ जून रोजी या प्रकरणी पंचनामा व गुन्हा नोंदवताना वनविभागाने या घातक २३ ड्रमचा कुठेही उल्लेख केला नाही. वनविभागाच्या या संशयास्पद आणि हलगर्जी भूमिकेमुळे तोंडापूर आणि जामनेर परिसरातील नागरिकांनी वनविभागातील कर्मचाऱ्यांवर मोठ्या आर्थिक गैरव्यवहाराचा थेट आरोप केला आहे. हे रासायनिक ड्रम डोंगराळ भागात लपवून ठेवल्याची शंका व्यक्त केली जात असून, या प्रकरणी वनमंत्री गणेश नाईक यांच्याकडे दोषी कर्मचाऱ्यांवर कायदेशीर कारवाई करण्याची मागणी करण्यात आली आहे.

या गंभीर प्रकरणाची दखल घेत सोयगाव महसूल विभागाने आज, दि. २० जून रोजी घटनास्थळाचा अधिकृत पंचनामा केला असून, हा अहवाल सोमवारी तहसील कार्यालयात सादर केला जाणार आहे. स्थानिकांनी नाव न सांगण्याच्या अटीवर दिलेल्या माहितीनुसार, जंगलात आणि पाण्याच्या प्रवाहाच्या दिशेने घातक रासायनिक ड्रम टाकण्याचा हा प्रकार गेल्या दोन महिन्यांपासून अव्याहतपणे सुरू आहे. हे ड्रम कुणी आणले, कशासाठी जंगलात टाकले आणि ते गायब करण्यामागे कोणाचा हेतू आहे, यासह अनेक प्रश्न अद्याप निरुत्तरित आहेत.

दुसरीकडे, सोयगाव तालुक्याला लागूनच असलेल्या जामनेर तालुक्यातील वाकोद ते वडाळी रस्त्यावरील तोंडेश्वर मंदिर परिसरातील नाल्यामध्ये गेल्या महिन्याभरात तब्बल ४०० ड्रम घातक केमिकल आणि कित्येक ट्रक भरून रासायनिक कचरा फेकून दिल्याचा खळबळजनक प्रकार उघडकीस आला आहे. एवढेच नव्हे तर एक मोठा विहिरीसारखा खड्डा खोदून त्यातही रसायने टाकण्यात आली आहेत. हा नाला पुढे जाऊन वाघूर नदीला मिळतो, ज्यामुळे खडकी नदी धरण, ढालगाव धरण आणि वाघूर प्रकल्प (कंडारी) प्रभावित झाले आहेत. येथूनच जळगाव शहराला पाणीपुरवठा केला जातो. या रसायनांमुळे जळगावमधील सुमारे पाच लाख लोकसंख्येचे आरोग्य थेट धोक्यात आले आहे. जामनेर महसूल विभागाने पाच ठिकाणी पंचनामे करून वरिष्ठ कार्यालयाला अहवाल सादर केला आहे, मात्र फर्दापूर पोलीस ठाण्याचे पोलीस निरीक्षक आणि सोयगाव महसूल विभागाकडून यावर कसलीही ठोस हालचाल झाली नसल्याचा आरोप डॉ. संतोष पाटील यांनी केला आहे.

या वाढत्या रासायनिक प्रदूषणामुळे पर्यावरण रक्षक भूषण कानडजे आणि डॉ. संतोष पाटील यांनी ईमेलद्वारे महाराष्ट्र राज्य प्रदूषण नियंत्रण मंडळाचे अध्यक्ष सिद्धेश कदम यांच्याकडे रीतसर तक्रार दाखल केली आहे. राज्यातील सर्व वनक्षेत्रे, डोंगर आणि विटभट्ट्यांच्या परिसरात तातडीने विशेष तपासणी मोहीम राबवून या रासायनिक माफियांवर गुन्हे नोंदवण्याची मागणी या तक्रारीत करण्यात आली आहे. या रासायनिक कचऱ्यामुळे जळगाव जिल्ह्याचा पाणीपुरवठा दूषित होण्याचा मोठा अनर्थ ओढवू शकतो, अशी भीती पर्यावरण तज्ज्ञांनी व्यक्त केली आहे.

• Labels: Ajanta Forest Department Case, Chemical Drums Disappearance, Waghur Dam Pollution Threat, Siddhesh Kadam Pollution Complaint, Ganesh Naik Forest Ministry 2026

• Search Description: High tension in Tondapur as 23 hazardous chemical drums disappear from Ajanta forest limits. Citizens allege financial corruption by forest officials.

• Hashtags: #AjantaForest #ChemicalScam #WaterPollution #TondapurNews #EnvironmentalHazards #AstraNewsNetwork