पिंपरी-चिंचवडमध्ये भाजपचा संघटनात्मक धडाका; निरंजन डावखरे यांच्या उपस्थितीत आगामी रणनीती निश्चित!

 

 "संघटनात्मक उपक्रमांत पिंपरी-चिंचवड नेहमीच राज्यात अग्रेसर" - आमदार निरंजन डावखरे यांच्याकडून कौतुक

पिंपरी-चिंचवड, दि. ३ जून २०२६ (विशेष प्रतिनिधी): केंद्रातील व राज्यातील भारतीय जनता पार्टी सरकारच्या लोककल्याणकारी योजना आणि विकासकामे सर्वसामान्य जनतेपर्यंत प्रभावीपणे पोहोचवण्यासाठी, तसेच आगामी काळातील मोठ्या संघटनात्मक उपक्रमांची रणनीती आखण्यासाठी आज पिंपरी-चिंचवड येथे भाजप पश्चिम महाराष्ट्र विभागाची अत्यंत महत्त्वाची 'विभागीय आढावा बैठक' मोठ्या उत्साहात पार पडली. राष्ट्रीय अध्यक्ष श्री नितीन नबीन आणि महाराष्ट्राचे मुख्यमंत्री देवेंद्र फडणवीस यांच्या मार्गदर्शनाखाली तसेच प्रदेशाध्यक्ष श्री रवींद्र चव्हाण यांच्या अध्यक्षतेखाली संपूर्ण राज्यात 'मोदी सरकारची यशस्वी वर्षे: विश्वास, विकास आणि जनकल्याण' हे महाअभियान राबवले जात आहे. या महाअभियानाचा भाग म्हणून पिंपरी-चिंचवड, पुणे उत्तर आणि मावळ जिल्हा पदाधिकाऱ्यांच्या उपस्थितीत पार पडलेल्या या विशेष बैठकीत प्रामुख्याने १ लाख वृक्षारोपण, आंतरराष्ट्रीय योग दिन, आणीबाणीचा काळा दिवस आणि पक्षाच्या 'SIR' (संघटन) नोंदणी मोहिमेचा सविस्तर आढावा घेऊन पुढील रणनीती निश्चित करण्यात आली. या प्रसंगी प्रमुख मार्गदर्शक म्हणून बोलताना भाजप महाराष्ट्र प्रदेश सरचिटणीस व विभाग समन्वयक आ. श्री निरंजन डावखरे यांनी, पक्ष संघटनेने दिलेली प्रत्येक जबाबदारी आणि सरकारी योजना तळागाळातील लोकांपर्यंत पोहोचवण्यात पिंपरी-चिंचवड शहर संपूर्ण राज्यात नेहमीच अग्रेसर राहिले आहे, असा ठाम विश्वास व्यक्त केला.

या बैठकीचे स्वागताध्यक्ष पद भाजप पिंपरी-चिंचवड शहर जिल्हाध्यक्ष श्री शत्रुघ्न (बापू) काटे आणि पुणे उत्तर (मावळ) जिल्हाध्यक्ष श्री प्रदीप कंद यांनी भूषवले. बैठकीला प्रदेश उपाध्यक्ष व विभाग सहसंयोजक मा. श्री विक्रम पावसकर, विभाग सहसंयोजक श्री विक्रम देशमुख, अभियान प्रदेश सहसंयोजक श्री विक्रम पाचपुते आणि जिल्हा प्रभारी श्री भरत पाटील यांची प्रमुख उपस्थिती व मार्गदर्शन लाभले. शहराध्यक्ष शत्रुघ्न (बापू) काटे यांनी आगामी उपक्रमांचे प्रभाग आणि मंडल पातळीवरील मायक्रो-प्लॅनिंग पूर्ण झाल्याची माहिती देताना बैठकीत ४ प्रमुख मोठ्या अभियानांची रूपरेषा मांडली. यामध्ये ५ जून रोजी 'पर्यावरण दिना'निमित्त पिंपरी-चिंचवड शहरात एकाच दिवशी १५,००० आणि संपूर्ण सप्ताहात १ लाखाहून अधिक झाडे लावून त्यांचे जतन करण्याचा संकल्प जाहीर करण्यात आला. यासोबतच २१ जून रोजी शहरातील विविध योग संस्थांच्या सहभागाने भव्य 'आन्तरराष्ट्रीय योग दिन' साजरा करणे, २५ जून रोजी आणीबाणीच्या ५१ व्या वर्षानिमित्त ज्येष्ठ 'मिसाबंदी' कार्यकर्त्यांचा जाहीर सत्कार करणे आणि विविध मंडलांमध्ये केंद्र सरकारच्या लोककल्याणकारी योजनांचे भव्य प्रदर्शन भरवून विद्यार्थ्यांसाठी चित्रकला स्पर्धा आयोजित करण्याचे निश्चित करण्यात आले.

पक्ष संघटनेचा मुख्य कणा असलेल्या 'SIR' (संघटन) नोंदणी अभियानाचा आढावा घेताना शहराध्यक्ष शत्रुघ्न बापू काटे यांनी सांगितले की, भोसरी, चिंचवड आणि पिंपरी या तिन्ही विधानसभा मतदारसंघांमध्ये कार्यकर्त्यांच्या मेहनतीमुळे आतापर्यंत जवळपास ४०% नोंदणी पूर्ण झाली असून पुढील १५ दिवसांत हा टप्पा ५०% पार करेल. पिंपरी-चिंचवडच्या या गतिमान कामगिरीबद्दल कोकण पदवीधर मतदारसंघाचे आमदार निरंजन डावखरे यांनी जाहीर समाधान व्यक्त केले. या महत्त्वपूर्ण बैठकीला आमदार श्री महेश लांडगे, आमदार श्री शंकर जगताप, माजी खासदार श्री अमर साबळे, माजी खासदार श्री रणजीतसिंह निंबाळकर, माजी आमदार श्रीमती अश्विनी जगताप, सत्तारूढ पक्षनेते श्री प्रशांत शितोळे, स्थायी समिती अध्यक्ष श्री अभिषेक बारणे, माजी अध्यक्ष श्री सदाशिव खाडे, सरचिटणीस सौ. वैशाली खाडये, सरचिटणीस श्री विकास डोळस यांच्यासह पश्चिम महाराष्ट्र आणि मावळ परिसरातील सर्व प्रमुख आजी-माजी लोकप्रतिनिधी, मंडल अध्यक्ष आणि सक्रिय कार्यकर्ते मोठ्या संख्येने उपस्थित होते. कार्यक्रमाचे नेटके सूत्रसंचालन श्री योगेश बाचलं यांनी केले, तर जिल्हा महामंत्री श्री मधुकर बच्चे यांनी उपस्थितांचे आभार मानले. राष्ट्रगीताने या यशस्वी आढावा बैठकीची सांगता झाली.

Labels

BJP Western Maharashtra Meeting, Niranjan Davkhare Pimpri, Shatrughan Bapu Kate BJP, Modi Govt Welfare Schemes, SIR Organisation Enrolment, Pimpri Chinchwad BJP News

Search Description

BJP Maharashtra General Secretary Niranjan Davkhare led the Western Maharashtra review meeting in Pimpri-Chinchwad, focusing on 1 lakh tree plantation and party organization.

Hashtags

#BJPReviewMeeting #NiranjanDavkhare #ShatrughanKate #PimpriChinchwadBJP #ModiGovtSchemes #SIREnrolment #MarathiNews