राजमाची सहल ठरली अखेरची; मैत्रिणीला वाचवताना मित्राचाही बॅकवॉटरमध्ये बुडून मृत्यू

 

कामशेतजवळील शिरोटे धरण परिसरातील दुर्दैवी घटना; ISBM कॉलेजच्या दोन विद्यार्थ्यांचा करुण अंत

कामशेत : पुण्यातील नामांकित आयएसबीएम (ISBM) महाविद्यालयातील विद्यार्थ्यांची राजमाची सहल रविवारी अत्यंत दुर्दैवी ठरली. कामशेत पोलीस ठाण्याच्या हद्दीतील शिरोटे (शिरदे) धरणाच्या बॅकवॉटरमध्ये पोहता येत नसतानाही पाण्यात उतरल्याने दोन २० वर्षीय विद्यार्थ्यांचा बुडून मृत्यू झाला. विशेष म्हणजे, पाण्यात बुडणाऱ्या मैत्रिणीला वाचवण्यासाठी धावलेल्या मित्रालाही पोहता येत नसल्याने दोघेही पाण्यात गडप झाले. या घटनेमुळे परिसरात तसेच महाविद्यालयीन वर्तुळात हळहळ व्यक्त होत आहे.

पोलीसांनी दिलेल्या माहितीनुसार, करण ज्ञानदेव ढोबरे (वय २०, रा. बालाजी विहार, कोडोली, सातारा) आणि कु. आर्या सुशांत बंडावार (वय २०, रा. गोंदिया) अशी मृत विद्यार्थ्यांची नावे आहेत. दोघेही पुण्यातील ISBM कॉलेजमध्ये शिक्षण घेत होते.

रविवारी सकाळी सातच्या सुमारास सुजल प्रकाश पवार (वय १९, रा. सुसगाव, मुळशी, मूळ रा. धुळे) याच्यासह करण ढोबरे, आर्या बंडावार, आस्था टेंबरे, सृष्टी गवाडे आणि ज्योत्सना शेळके असे सहा मित्र-मैत्रिणी दुचाकींवरून राजमाची किल्ला फिरण्यासाठी निघाले होते. जुन्या पुणे-मुंबई महामार्गाने प्रवास करताना त्यांनी वडगाव येथे नाश्ता केला. राजमाची परिसरात पोहोचल्यानंतर गडावर जाण्याचा बेत बदलून त्यांनी जवळच असलेल्या शिरोटे धरणाच्या बॅकवॉटर परिसरात जाण्याचा निर्णय घेतला.

दुपारी बारा वाजण्याच्या सुमारास सर्वजण धरण परिसरात पोहोचले. सुरुवातीला सर्व मित्र पाण्याच्या काठावर बसून गप्पा मारत होते. काही वेळाने पाणी गढूळ असल्याने आर्या बंडावार आणि ज्योत्सना शेळके या दोघी पुढे स्वच्छ पाणी असल्याचे सांगत थोड्या अंतरावर गेल्या. मात्र, पाण्याचा अंदाज न आल्याने आर्या अचानक खोल पाण्यात गेली आणि बुडू लागली.

आर्याला वाचवण्यासाठी ज्योत्सना हिने तिचा हात पकडण्याचा प्रयत्न केला, मात्र तिला यश आले नाही. त्यानंतर ज्योत्सनाने आरडाओरडा करत मदतीसाठी हाक मारली. हा आवाज ऐकताच काठावर असलेला करण ढोबरे तात्काळ आर्याच्या दिशेने धावला आणि तिला वाचवण्यासाठी पाण्यात उडी घेतली. मात्र, दुर्दैवाने करणलाही पोहता येत नसल्याने तोदेखील खोल पाण्यात अडकला. काही क्षणातच दोघेही पाण्यात गडप झाले.

घटनेनंतर सुजल पवार आणि इतर पर्यटकांनी दोघांना वाचवण्याचा प्रयत्न केला. मात्र, पाण्याचा खोलीचा अंदाज न आल्याने प्रयत्न अपयशी ठरले. त्यानंतर मित्रांनी तात्काळ ‘डायल १००’ वर संपर्क साधून पोलिसांना माहिती दिली.

घटनेची माहिती मिळताच कामशेत पोलीस ठाण्याचे प्रभारी सहायक पोलीस निरीक्षक आकाश पवार यांच्या मार्गदर्शनाखाली पोलीस पथक, स्थानिक नागरिक आणि बचाव पथकाने घटनास्थळी धाव घेत शोधमोहीम सुरू केली. काही वेळानंतर दोघांनाही पाण्यातून बाहेर काढण्यात आले. त्यांना तातडीने रुग्णवाहिकेतून महावीर हॉस्पिटलमध्ये नेण्यात आले. मात्र डॉक्टरांनी तपासणी करून दोघांनाही उपचारापूर्वीच मृत घोषित केले.

याप्रकरणी कामशेत पोलीस ठाण्यात अकस्मात मृत्यू रजिस्टर क्रमांक १९/२०२६ अन्वये बीएनएस कलम १९४ प्रमाणे नोंद करण्यात आली आहे. दाखल अंमलदार पोलीस हवालदार हिप्परकर यांनी नोंद केली असून पुढील तपास पोलीस हवालदार लबडे करीत आहेत.

Labels (Categories): Crime News, Pune District, Kamshet, Accidental Death, Tourist Drowning, Maharashtra News, College Students Tragedy.

Search Description: Two 20-year-old college students from Satara and Gondia drowned in the backwaters of Shirota Dam near Kamshet, Pune while on a Sunday trip with friends.

Hashtags: #PuneNews #Kamshet #ShirotaDam #DrowningTragedy #Satara #Gondia #PicnicTragedy #MaharashtraPolice #BNS194