बुधवार पेठेत पोलिसांचे 'कोंबिंग ऑपरेशन'; ६ बांगलादेशी महिलांना अटक

 

पुणे: पुणे शहरातील बुधवार पेठ येथील रेडलाईट एरियामध्ये पोलिसांनी मध्यरात्री राबवलेल्या धडक 'कोंबिंग ऑपरेशन' (Combining Operation) दरम्यान ६ बांगलादेशी महिलांना अटक केली आहे. या महिला कोणत्याही वैध कागदपत्रांशिवाय छुप्या पद्धतीने भारतात राहून वेश्याव्यवसाय करत असल्याचे तपासात निष्पन्न झाले आहे.

 
मध्यरात्री 'सागर बिल्डिंग'वर छापा

पोलीस उप-आयुक्त (परिमंडळ-१) श्री. कृषिकेश रावले यांना बुधवार पेठ भागातील अवैध वास्तव्याबाबत अत्यंत गोपनीय माहिती मिळाली होती. या माहितीच्या आधारे २४ मे २०२६ रोजी रात्री ठीक ०१:०० वाजता फरासखाना आणि खडक पोलीस स्टेशनच्या संयुक्त पथकाने बुधवार पेठेतील 'सागर बिल्डिंग' येथे पंचांसह अचानक छापा टाकला. या छाप्यादरम्यान पोलिसांना संशयास्पद ६ बांगलादेशी महिला आढळून आल्या.

 
शिलाईकाम, ब्युटी पार्लरच्या बहाण्याने आणले, नंतर वेश्याव्यवसाय

पोलिसांनी ताब्यात घेतलेल्या महिलांची सखोल चौकशी केली असता, धक्कादायक माहिती समोर आली. या महिलांनी बांगलादेशातून बेकायदेशीरपणे आंतरराष्ट्रीय बॉर्डर पार करून छुप्या पद्धतीने भारतात प्रवेश केला होता. एजंटमार्फत त्यांना सुरुवातीला पश्चिम बंगाल आणि त्यानंतर पुण्यात शिलाईकाम, ब्युटी पार्लर तसेच घरकामाच्या बहाण्याने आणण्यात आले होते. मात्र, पुण्यात आल्यानंतर त्या स्वतःच्या इच्छेने (स्वेच्छेने) वेश्याव्यवसाय करू लागल्या. त्यांच्याकडे बांगलादेशी नागरिक असल्याचे सबळ पुरावे मिळाल्याने पोलिसांनी त्यांना पुढील कायदेशीर कारवाईसाठी ताब्यात घेतले आहे.

 
डीसीपी कृषिकेश रावले यांच्याकडून आतापर्यंत १०३ बांगलादेशींची हकालपट्टी

पुणे शहर पोलीस उप-आयुक्त (झोन १) श्री. कृषिकेश रावले यांनी आपल्या पदाचा कार्यभार स्वीकारल्यापासून अवैधरित्या राहणाऱ्या परदेशी नागरिकांविरोधात मोठी मोहीम उघडली आहे. त्यांनी आतापर्यंत वेगवेगळ्या कारवायांद्वारे भारतात अनधिकृतपणे राहणाऱ्या सुमारे १०३ बांगलादेशी महिला व पुरुषांना शोधून काढून, त्यांना त्यांच्या देशात (बांगलादेशात) परत पाठवण्याची कायदेशीर प्रक्रिया पूर्ण केली आहे.

 
वरिष्ठ अधिकाऱ्यांच्या मार्गदर्शनात धडक कामगिरी

सदरची धडक कारवाई पुणे पोलीस आयुक्त श्री. अमितेश कुमार, पोलीस सह आयुक्त श्री. प्रविण दराडे, अपर पोलीस आयुक्त (पश्चिम प्रादेशिक विभाग) श्री. राजेश बनसोडे, आणि डीसीपी श्री. कृषिकेश रावले यांच्या थेट मार्गदर्शनाखाली करण्यात आली.

या कारवाईत फरासखाना पोलीस ठाण्याचे वरिष्ठ पोलीस निरीक्षक श्री. प्रशांत भस्मे, खडक पोलीस ठाण्याचे वरिष्ठ पोलीस निरीक्षक श्री. शशिकांत चव्हाण, पोलीस निरीक्षक (गुन्हे) श्री. एस. पी. मुळे, सहाय्यक पोलीस निरीक्षक कुदळे, पोलीस उपनिरीक्षक अरविंद शिंदे, जवळगी, कांबळे तसेच फरासखाना व खडक पोलीस ठाण्यातील अंमलदार मोरे, वशीम शेख, बनसोडे, चोरघडे, महाडीक, दिवटे, गायकवाड, केदारी, दुडुम, हरबा, यादव, परदेशी आणि लांडगे यांनी महत्त्वपूर्ण भूमिका बजावली.