कल्याण: कल्याण येथील अंमली पदार्थ विरोधी विशेष कारवाई पथकाने आणि खडकपाडा पोलिसांनी संयुक्तरित्या एक मोठी कारवाई केली आहे. वाडेघर डम्पिंग ग्राऊंड परिसरातील सार्वजनिक रस्त्याच्या कडेला संशयास्पदरीत्या उभे असलेल्या तीन सराईत तस्करांना पोलिसांनी रंगेहात पकडले. त्यांच्या ताब्यातून तब्बल २१ लाख ४० हजार रुपये किमतीचा १०७ किलो ५० ग्रॅम 'गांजा' हा अमली पदार्थ, रोख रक्कम आणि मोबाईल फोन असा एकूण २१ लाख ९१ हजार ५०० रुपयांचा मुद्देमाल जप्त करण्यात आला आहे.
अटक करण्यात आलेल्या आरोपींमध्ये वसिम नुरूजमा खान उर्फ पिला (वय ३६ वर्षे, रा. भिवंडी), दिनेशकुमार सजीवर सरोज (वय ३० वर्षे, रा. वागळे इस्टेट, ठाणे) आणि मोहित मेवालाल वर्मा (वय २७ वर्षे, रा. मुलुंड, मुंबई) यांचा समावेश आहे. पोलिसांनी या आरोपींना न्यायालयात हजर केले असता, न्यायालयाने त्यांना ९ मे २०२६ पर्यंत पोलीस कोठडी सुनावली आहे.
पोलीस सूत्रांनी दिलेल्या माहितीनुसार, ४ मे २०२६ रोजी दुपारी दोन वाजण्याच्या सुमारास अंमली पदार्थ विरोधी पथकातील सहायक पोलीस निरीक्षक अनिल गायकवाड, पोलीस उपनिरीक्षक जितेंद्र ठोके व त्यांचे सहकारी खडकपाडा पोलीस ठाण्याच्या हद्दीत फरार आरोपींचा शोध घेण्यासाठी गस्त घालत होते. गस्ती दरम्यान पोलिसांना वाडेघर डम्पिंग ग्राऊंडच्या बाजूला तीन इसम संशयास्पदरीत्या गोण्या घेऊन आपसात चर्चा करताना दिसले. पोलिसांचा संशय बळावल्याने पथक त्यांच्याकडे जात असताना आरोपींनी पळून जाण्याचा प्रयत्न केला, मात्र पोलिसांनी सतर्कता दाखवत त्यांना जागीच घेरून ताब्यात घेतले.
पंचांसमक्ष आरोपींची अंगझडती घेतली असता, त्यांच्याकडे असलेल्या हिरव्या आणि पांढऱ्या रंगाच्या गोण्यांमध्ये २१ लाख ८० हजार रुपये किमतीचा १०७ किलो ५० ग्रॅम गांजा आढळला. याशिवाय त्यांच्याकडून १० हजार ५०० रुपयांची रोख रक्कम आणि ४१ हजार रुपये किमतीचे तीन मोबाईल फोन जप्त करण्यात आले. या प्रकरणी पोलीस अंमलदार आकाश बिरपन यांच्या फिर्यादीवरून खडकपाडा पोलीस ठाण्यात एन.डी.पी.एस. कायद्याच्या कलम ८(क), २०(ब)(क), २९ नुसार गुन्हा दाखल करण्यात आला आहे.
पोलीस तपासात समोर आले आहे की, अटक करण्यात आलेले तिन्ही आरोपी सराईत गुन्हेगार आहेत. आरोपी वसिम खान याच्यावर यापूर्वी घाटकोपर युनिट-७ मध्ये अडीच किलो चरस तस्करीचा गुन्हा दाखल आहे. दिनेशकुमार सरोज याच्यावर तब्बल १८२० किलो गांजा तस्करीचा, तर मोहित वर्मा याच्यावर मुलुंड पोलीस ठाण्यात ड्रग्ज प्रकरणी गुन्हे नोंद आहेत. कल्याण परिमंडळ ३ मध्ये अंमली पदार्थांच्या तस्करांविरोधातील ही विशेष मोहीम यापुढेही अधिक तीव्रतेने सुरू राहील, असा इशारा पोलीस प्रशासनाने दिला आहे.
Labels: Crime News, Kalyan Police, NDPS Act, Drug Seizure, Maharashtra Crime News.
Search Description: Kalyan Anti-Narcotics Cell and Khadakpada Police arrested three drug peddlers near Wadeghar dumping ground, seizing 107 kg of Ganja worth ₹21.40 lakh.
Hashtags: #KalyanCrime #DrugBust #ThanePolice #NDPSAct #BreakingNews #MaharashtraPolice
Reviewed by ANN news network
on
५/०६/२०२६ ०४:३०:०० PM
Rating:
कोणत्याही टिप्पण्या नाहीत: