राज्य मंत्रिमंडळाचे महत्त्वाचे निर्णय

मुंबईत टाटा मेमोरिअल सेंटरच्या रुग्णालयासाठी मुद्रांक शुल्क माफ

कोल्हापूर आणि सिंधुदुर्ग जिल्ह्यांतील जमिनीबाबतही निर्णय

शासकीय वैद्यकीय महाविद्यालयातील १७ कर्मचाऱ्यांची सेवा नियमित

मुंबई, (प्रतिनिधी): राज्य मंत्रिमंडळाच्या बैठकीत अनेक महत्त्वाचे निर्णय घेण्यात आले. मुंबईतील टाटा मेमोरिअल सेंटरच्या एकात्मिक आयुर्वेदिक कर्करोग दवाखाना आणि संशोधन केंद्रासाठी १०० खाटांचे रुग्णालय उभारण्यासाठी मुद्रांक शुल्क माफ करण्याचा निर्णय घेण्यात आला आहे.

याशिवाय, कोल्हापूर जिल्ह्यातील सावित्रीबाई फुले महिला सहकारी औद्योगिक वसाहत संस्थेला कसबा करवीर येथील गट क्र. ६९७/३/६ मधील २ हेक्टर ५० आर जमीन देण्याचा निर्णय घेण्यात आला आहे. सिंधुदुर्ग जिल्ह्यातील वेंगुर्ला-कॅम्प गवळीवाडा येथील शासकीय जमिनीवरील अतिक्रमण नियमानुकूल करण्यासही मंत्रिमंडळाने मान्यता दिली आहे.

वैद्यकीय शिक्षण व औषधी द्रव्ये विभागाने दिलेल्या प्रस्तावानुसार, राज्यातील शासकीय वैद्यकीय महाविद्यालय आणि रुग्णालयातील गट-क (तांत्रिक) संवर्गात २९ दिवसांवर कार्यरत असलेल्या १७ कर्मचाऱ्यांची तात्पुरती सेवा नियमित करण्यासही मंत्रिमंडळाने मंजुरी दिली आहे.