उद्धव बाळासाहेब ठाकरे पक्षाचे धुळ्यात तीव्र आंदोलन

 

गिरीश महाजन, संजय शिरसाट, माणिकराव कोकाटे यांच्या राजीनाम्याची मागणी 

धुळे: राज्यातील महायुती सरकारमधील भ्रष्टाचारी आणि वादग्रस्त मंत्र्यांच्या राजीनाम्याच्या मागणीसाठी आज धुळे शहरात शिवसेना (उद्धव बाळासाहेब ठाकरे) पक्षाच्या वतीने तीव्र आंदोलन करण्यात आले. या वेळी काढण्यात आलेल्या मोर्चाद्वारे पक्षाच्या पदाधिकाऱ्यांनी मुख्यमंत्री देवेंद्र फडणवीस यांच्यावर भ्रष्ट मंत्र्यांना पाठीशी घालत असल्याचा आरोप केला.

शिवसेना (उद्धव बाळासाहेब ठाकरे) पक्षाच्या कार्यकर्त्यांनी मंत्री गिरीश महाजन, मंत्री संजय शिरसाट, मंत्री माणिकराव कोकाटे, मंत्री भरत गोगावले आणि गृहराज्यमंत्री योगेश कदम यांच्या राजीनाम्याची मागणी केली. हे मंत्री वादग्रस्त असून त्यांच्यावरील आरोपांची चौकशी केली जावी, अशी मागणीही यावेळी करण्यात आली. मुख्यमंत्री देवेंद्र फडणवीस हे अशा मंत्र्यांना पदावरून तात्काळ हटवण्याऐवजी त्यांची पाठराखण करत असल्याचा आरोप आंदोलकांनी केला.

या आंदोलनात मोठ्या संख्येने कार्यकर्ते सहभागी झाले होते. त्यांनी सरकारविरोधात जोरदार घोषणाबाजी केली. जोपर्यंत या मंत्र्यांवर कारवाई होत नाही, तोपर्यंत आंदोलन सुरूच राहील, असा निर्धार या वेळी व्यक्त करण्यात आला.

Politics, Protest, Shiv Sena (UBT), Dhule, Corruption 

 #Dhule #ShivSenaUBT #Protest #Corruption #MaharashtraPolitics #GirishMahajan #SanjayShirsat