सलमान खानच्या हस्ते इंडियन सुपरक्रॉस रेसिंग लीगच्या दुसऱ्या पर्वाचा शुभारंभ; मोटरस्पोर्टला मिळणार नवी दिशा

 

मुंबई, १६ जुलै २०२५: बॉलिवूडचे सुपरस्टार सलमान खान यांच्या हस्ते आज मुंबईत इंडियन सुपरक्रॉस रेसिंग लीगच्या (आयएसआरएल) दुसऱ्या हंगामाचा भव्य शुभारंभ करण्यात आला. आयएसआरएलचे ब्रँड अॅम्बेसिडर असलेले सलमान खान आता या लीगमध्ये गुंतवणूकदार म्हणूनही सहभागी होणार आहेत. त्यांच्या या सक्रिय सहभागामुळे मोटरस्पोर्टला मुख्य प्रवाहात आणून प्रत्येक घराघरात पोहोचवण्याचा विश्वास व्यक्त करण्यात आला.

आयएसआरएल प्रोव्हिंग ग्राउंड्सचे पुण्यात उद्घाटन

भारतात सुपरक्रॉसला आंतरराष्ट्रीय पातळीवर घेऊन जाण्याच्या दृष्टीने सलमान खान यांच्या हस्ते ‘आयएसआरएल प्रोव्हिंग ग्राउंड्स’ चा देखील शुभारंभ करण्यात आला. पुणेजवळ ७ एकर परिसरात उभारण्यात येणाऱ्या या अद्ययावत सुविधेत नवोदित रायडर्ससाठी विशेष ट्रॅक्स असणार आहेत. यामध्ये नवशिक्यांसाठी, मुलांसाठी, मोटोकॉस, सुपरक्रॉस, एटीव्ही, इलेक्ट्रिक बाइक्स आणि ट्रेल रायडिंगसाठी स्वतंत्र ट्रॅक्स उपलब्ध असतील. हे मैदान वाहन कंपन्यांसाठी वर्षभर चाचणी व प्रमोशनचे व्यासपीठ उपलब्ध करून देईल.

१५५ आंतरराष्ट्रीय खेळाडूंची नोंदणी

आयएसआरएलच्या दुसऱ्या हंगामासाठी १५५ आंतरराष्ट्रीय खेळाडूंनी नोंदणी केली आहे, ज्यामुळे या लीगची जागतिक स्तरावरील वाढती लोकप्रियता दिसून येते. याव्यतिरिक्त, रेसिंग, मनोरंजन आणि ब्रँडशी थेट जोडणाऱ्या कौटुंबिक-केंद्रित अनुभवासाठी ‘आयएसआरएल फॅन पार्क्स’ ची देखील सुरुवात करण्यात येणार आहे.

सलमान खान यांचा मोटरस्पोर्टप्रतीचा उत्साह

यावेळी बोलताना सलमान खान म्हणाले, “मोटरसायकल आणि ऑफ-रोडिंगबाबत माझी नेहमीच विशेष आवड राहिली आहे. आयएसआरएल जे काही तयार करत आहे, ते पाहून मला जाणवले की मी फक्त चेहरा म्हणून नाही, तर खऱ्या अर्थाने याचा भाग व्हावे. ही लीग म्हणजे क्षमता वाढवून पुढे जाण्याचा प्रयत्न आहे. ‘आयएसआरएल प्रोव्हिंग ग्राउंड्स’मुळे भारताच्या युवा पिढीला जागतिक स्तरावर स्पर्धा करण्याची संधी मिळणार आहे. आयएसआरएल जबाबदार राईडिंगला आणि सुरक्षिततेला समान प्राधान्य देत आहे.”

आयएसआरएलची ५ वर्षांची महत्त्वाकांक्षी योजना

आयएसआरएलचे व्यवस्थापकीय संचालक वीर पटेल यांनी सलमान खान यांचा ब्रँड अॅम्बेसिडरपासून गुंतवणूकदार बनण्याचा प्रवास हा आयएसआरएलच्या दृष्टीकोनात त्यांचा ठाम विश्वास दर्शवतो, असे सांगितले. आयएसआरएलच्या पुढील ५ वर्षांच्या रोडमॅपमध्ये अनेक शहरांमध्ये वेगाने विस्तार, आंतरराष्ट्रीय सहकार्य, जागतिक खेळाडूंचा सहभाग आणि फ्रँचायझी मूल्य, प्रायोजक महसूल व ब्रँड भागीदारींमध्ये महत्त्वपूर्ण वाढ यांचा समावेश आहे. पुणे, अहमदाबाद आणि बंगळूरु येथे यशस्वी पदार्पण हंगामानंतर, आयएसआरएल भारताची अग्रगण्य मोटरस्पोर्ट लीग होण्याच्या दिशेने वाटचाल करत आहे.

---

Indian Supercross Racing League, ISRL, Salman Khan, Motorsport, Pune Proving Grounds, Mumbai Launch, Sports Investment, Motorcycling

#ISRL #SalmanKhan #Motorsport #Supercross #Pune #Mumbai #SportsIndia #Bollywood #Motorcycling