पांडुरंग हरी! मुख्यमंत्री देवेंद्र फडणवीस यांनी 'दोन भाऊ' एकत्र आल्याबद्दल व्यक्त केला आनंद; राज ठाकरे यांचे मानले आभार! (VIDEO)

 

पंढरपूर, दि. ५ जुलै, २०२५: आषाढी एकादशीच्या निमित्ताने पंढरपुरात उपस्थित असलेले मुख्यमंत्री देवेंद्र फडणवीस यांनी आज प्रसारमाध्यमांशी संवाद साधताना, महाराष्ट्र नवनिर्माण सेनेचे अध्यक्ष राज ठाकरे यांनी त्यांना  'दोन भाऊ' एकत्र आणण्याचे श्रेय दिल्याबद्दल त्यांचे आभार मानले.

यावेळी, त्यांनी शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांच्यावर अप्रत्यक्ष निशाणा साधला. "विजयी मेळाव्यात मराठीबद्दल एकही शब्द न बोलता, आमचं सरकार गेलं, आम्हाला निवडून द्या असं 'रुदालीचं' (शोकगीत) भाषण त्यांनी केले," असा टोला फडणवीस यांनी लगावला. तसेच, "पंचवीस वर्षे मुंबई महानगरपालिकेची सत्ता त्यांच्याकडे असतानाही दाखवण्यासारखं कोणतंही काम ते करू शकले नाहीत," अशी टीकाही फडणवीस यांनी केली.

मराठी भाषेवरील राजकारण: बावनकुळेंचा उद्धव ठाकरेंवर पलटवार 

राज्याचे महसूल मंत्री चंद्रशेखर बावनकुळे यांनीही उद्धव ठाकरे यांच्यावर मराठी भाषेच्या नावाखाली राजकारण करत असल्याची टीका केली. "उद्धव ठाकरे मुख्यमंत्री असताना पहिलीपासून हिंदी सक्तीचा अहवाल का स्वीकारला, याचं उत्तर त्यांनी दिलंच नाही," असा प्रश्न बावनकुळे यांनी उपस्थित केला. "मराठी भाषेचं प्रेम धोरणात दिसलं पाहिजे," असे म्हणत, उद्धव ठाकरे यांची ही भूमिका केवळ आगामी महानगरपालिका निवडणुकांसाठी असल्याची टीका बावनकुळे यांनी समाज माध्यमांवर केली.

Maharashtra Politics, Devendra Fadnavis, Raj Thackeray, Uddhav Thackeray, Political Criticism, Marathi Language, Mumbai BMC Elections

#MaharashtraPolitics #DevendraFadnavis #RajThackeray #UddhavThackeray #MarathiLanguage #BMC #ChandrashekharBawankule #Pandharpur