८६ लाखांची सायबर फसवणूक, कथित चित्रपट निर्माता गजाआड

 

पिंपरी-चिंचवड: सायबर गुन्हेगारांच्या नवीन युक्तीचा पर्दाफाश करत पिंपरी-चिंचवड पोलिसांनी एका चित्रपट निर्मात्याला अटक केली आहे. चायनीज नागरिकांच्या निर्देशानुसार त्याने आपले बँक खाते 'अॅबॉट वेल्थ' ॲप फसवणुकीसाठी उपलब्ध करून दिले होते. या खात्यातून तब्बल ८६ लाख ४३ हजार ११० रुपयांची फसवणूक झाल्याचे उघड झाले आहे.

या प्रकरणात मुख्य फिर्यादीने युट्यूब व्हिडीओतील व्हॉट्सॲप लिंकद्वारे 'अॅबॉट वेल्थ' ॲपवर नोंदणी केली होती. सुरुवातीला ५०० रुपयांची गुंतवणूक केल्यानंतर त्याला ५ कोटी १५ लाख रुपयांचा नफा दाखवण्यात आला. परंतु पैसे काढण्याच्या वेळी विविध शुल्काच्या नावाने मोठ्या रकमांची मागणी केल्याने त्याला संशय आला. त्यानंतर त्याने ५७ लाख ७० हजार ६७० रुपयांची फसवणूक झाल्याची तक्रार सायबर पोलिसांत दाखल केली.

पोलिसांच्या पथकाने तपास करताना आयडीएफसी बँकेतील 'बालाजी इंटरप्रायझेस' नावाचे संशयास्पद खाते शोधून काढले. डेक्कन पोलीस ठाण्याच्या सहकार्याने आरोपी चित्रपट निर्मात्याला ताब्यात घेण्यात आले. सुरुवातीला तो आपली निर्दोषता सांगत होता, परंतु पोलीस निरीक्षक प्रविण स्वामी यांच्या कसून चौकशीनंतर त्याने चायनीज नागरिकांच्या सूचनेनुसार खाते उघडल्याची कबुली दिली.

या खात्याशी संबंधित १५ हून अधिक फसवणुकीच्या तक्रारी आल्या असून, आरोपीच्या मोबाईलमध्ये आणखी दोन संशयास्पद बँक खाती सापडली आहेत. पोलिसांनी त्याच्याकडून दोन मोबाईल फोन जप्त केले असून, त्याच्या सर्व बँक खात्यांची सविस्तर तपासणी सुरू आहे. या गुन्ह्यात सहभागी 'बाम्बिनी' नावाच्या चायनीज नागरिकाचा आणि इतर सहआरोपींचा शोध घेतला जात आहे. पोलीस निरीक्षक रविकिरण नाळे या प्रकरणाचा पुढील तपास करत आहेत.

Cyber Fraud, Online Scam, Film Producer Arrested, Financial Crime, Investment Fraud 

 #CyberFraud #PimpriChinchwadPolice #OnlineScam #FilmProducerArrested #FinancialCrime #AbbotWealthScam #PunePolice