मुंबई विद्यापीठाच्या ई-समर्थ पोर्टलवर आता नोकरी आणि इंटर्नशिप्स एका क्लिकवर!

 

मुंबई: राष्ट्रीय शैक्षणिक धोरणाच्या प्रभावी अंमलबजावणीच्या अनुषंगाने, मुंबई विद्यापीठाने विद्यार्थ्यांची नोकरी मिळवण्याची क्षमता (योग्यता) आणि करिअरबाबतची सजगता वाढवण्यासाठी एक महत्त्वाचे पाऊल उचलले आहे. विद्यापीठाच्या ई-समर्थ पोर्टलवर 'प्लेसमेंट आणि ट्रेनिंग' नावाचे एक नवीन मॉड्यूल सुरू करण्यात आले आहे. ऑन-द-जॉब ट्रेनिंग, इंटर्नशिप आणि औद्योगिक संलग्नता यांना उच्च शिक्षणाशी जोडण्याच्या विद्यापीठाच्या व्यापक दृष्टिकोनातील हा एक महत्त्वाचा टप्पा आहे.

यामुळे विद्यापीठाच्या विविध अभ्यासक्रमांमध्ये नोंदणी केलेल्या विद्यार्थ्यांना आता या पोर्टलद्वारे इंटर्नशिप आणि नोकरीच्या संधी सहजपणे शोधता येणार आहेत. तसेच, सार्वजनिक, खासगी, राष्ट्रीय किंवा आंतरराष्ट्रीय संस्था आणि औद्योगिक आस्थापनांना देखील विद्यापीठातील होतकरू विद्यार्थ्यांपर्यंत पोहोचणे सोपे होणार आहे. या संस्था आणि आस्थापना या पोर्टलवर नोंदणी करून त्यांना लागणाऱ्या मनुष्यबळाची गरज नोंदवू शकतील. मुंबई विद्यापीठाने सुरू केलेले हे नवे प्रारूप विद्यार्थी आणि संभाव्य नियोक्ते या दोघांसाठीही एक सुलभ, पारदर्शक आणि कार्यक्षम व्यासपीठ म्हणून उपलब्ध होईल.

मुंबई विद्यापीठाच्या करिअर ट्रेनिंग अँड प्लेसमेंट सेलने (सीटीपीसी) या मॉड्यूलसाठी पुढाकार घेतला आहे. विद्यापीठातील विविध विभागांचे प्रमुख, संचालक, प्लेसमेंट समन्वयक आणि उद्योग क्षेत्राशी वेळोवेळी समन्वय साधून सीटीपीसी या प्रारूपाच्या प्रभावी अंमलबजावणीसाठी प्रयत्नशील राहणार आहे. गुणवत्तापूर्ण मनुष्यबळ मिळवण्यास इच्छुक असलेल्या संस्था https://mu.samarth.ac.in/index.php/training/company-profile-requests/register या इसमर्थ प्रणालीच्या पोर्टलवर नोंदणी करून आपल्या गरजा नोंदवून शैक्षणिक-औद्योगिक सहयोगाच्या या व्यासपीठाचा भाग होऊ शकतील.

---

 Mumbai University, e-Samarth Portal, Internships, Job Opportunities, National Education Policy, Career Training & Placement Cell, Student Placement

 #MumbaiUniversity #eSamarthPortal #Internship #JobOpportunities #NationalEducationPolicy #StudentPlacement #CareerDevelopment #HigherEducation