अधिकाधिक हरकती नोंदवून विकास आराखडा रद्द करण्यासाठी लढा; मारुती भापकर यांचे आवाहन

प्रारूप विकास आराखडा: हजारो घरे-दुकाने धोक्यात, नागरिकांची हरकत नोंदवण्यासाठी गर्दी

पिंपरी-चिंचवड, २३ जून: पिंपरी-चिंचवड महानगरपालिकेच्या प्रारूप विकास आराखड्यामुळे हजारो घरे-दुकाने धोक्यात येण्याच्या पार्श्वभूमीवर नागरी हक्क कृती समितीचे मारुती भापकर यांनी सर्व नागरिकांना मोठ्या संख्येने हरकती नोंदवण्याचे जोरदार आवाहन केले आहे. त्यांच्या या आवाहनाला प्रतिसाद देत सोमवारी सकाळी मोहननगर, रामनगर, काळभोरनगर, दत्तनगरसह अनेक भागांतील नागरिकांनी महापालिका मुख्यालयात मोठ्या प्रमाणावर व्यक्तिगत हरकती नोंदवल्या आहेत.

महापालिकेने जाहीर केलेल्या या विकास आराखड्यात प्रस्तावित रस्ते आणि विविध आरक्षणांमुळे मोहननगर, रामनगर, काळभोरनगर, महात्मा फुलेनगर, दत्तनगर, विद्यानगर, परशुरामनगर या भागांतील अनेक मालमत्ता प्रभावित होण्याची भीती आहे. या पार्श्वभूमीवर नागरिकांमध्ये चिंतेचे वातावरण निर्माण झाले असून, त्यांनी संघटित होऊन आपल्या हक्कांसाठी लढण्याचा निश्चय केला आहे.

सोमवारी सकाळी ११:३० वाजता महापालिका मुख्यालयात माजी नगरसेवक मारुती भापकर, राजू दुर्गे, प्रसाद शेट्टी, महादेव नेरलेकर, दत्ता देवतरासे, सोमनाथ अलंकार, बापूसाहेब हाके, प्रसाद दौंडकर, राजू पाटील, सलीम शेख, रोप शेख, श्रीजीत पिल्ले यांच्यासह मोठ्या संख्येने कार्यकर्ते आणि नागरिक उपस्थित होते.

या विकास आराखड्याबाबत सूचना व हरकती नोंदवण्याची ६० दिवसांची मुदत १८ जुलै २०२५ पर्यंत असून, नागरी हक्क कृती समितीने आधीच या भागांमध्ये हरकतीच्या मसुदा फॉर्मचे वाटप केले होते. समितीने नागरिकांना सांगितले आहे की, प्रत्येक कुटुंबातील प्रत्येक व्यक्तीने व्यक्तिगत स्वाक्षरी करून आपली हरकत नोंदवावी.

नागरी हक्क कृती समितीचे मारुती भापकर यांनी सांगितले की, अजूनही या भागांतील अनेक नागरिकांनी आपल्या हरकती नोंदवलेल्या नाहीत. त्यांनी सर्व नागरिकांना मोठ्या संख्येने महापालिका मुख्यालयात जाऊन आपल्या सूचना व हरकती नोंदवण्याची नम्र विनंती केली आहे.