पिंपरी कॅम्पमधील रस्ते रुंदीकरणास पिंपरी मर्चंट फेडरेशनचा तीव्र विरोध!

पिंपरी, पुणे (दि. २७ जून २०२५): पिंपरी चिंचवड महानगरपालिकेने नुकताच जाहीर केलेला प्रारूप विकास आराखडा पिंपरी कॅम्पमध्ये स्थायिक झालेल्या सिंधी व इतर व्यापारी बांधवांवर अन्यायकारक असल्याचे मत पिंपरी मर्चंट फेडरेशनचे अध्यक्ष श्रीचंद आसवाणी यांनी व्यक्त केले आहे. हा आराखडा येथील व्यापाऱ्यांचे व्यवसाय धोक्यात आणून त्यांना विस्थापित करेल, असा आरोप करत फेडरेशनने महानगरपालिका प्रशासनाला लेखी हरकत पत्र दिले आहे.

व्यापाऱ्यांच्या प्रमुख मागण्या

रस्ते रुंदीकरणास विरोध: फेडरेशनने पत्राद्वारे मागणी केली आहे की, पिंपरी कॅम्पमधील खालील अंतर्गत रस्ते सध्याच्या स्थितीतच ठेवावेत आणि त्यात कोणताही बदल करू नये, कारण हे रस्ते आणखी रुंद केल्यास येथील व्यापाऱ्यांच्या रोजीरोटीचा व निवासाचा प्रश्न निर्माण होईल:
- साई चौक, पिंपरी (शनी मंदिर - वैष्णव देवी मंदिर) ते लालबहादूर शास्त्री उद्यान
- साई चौक पिंपरी ते भटनागर चौक
- रेल्वे स्थानक (साई बाबा मंदिर क्रांती रिक्षा स्टँड) ते स्वर्गीय किंमतराम आसवाणी अंडरपास पर्यंत
- लालबहादूर शास्त्री उद्यान ते साधू वासवाणी रस्ता
- लालबहादूर शास्त्री उद्यान ते अशोक थिएटर
- अशोक थिएटर ते तपोवन मंदिर रस्त्यापर्यंत
- काळेवाडी पूल (पवना नदी जवळून) ते पवनेश्वर मंदिर पूल
- रिव्हर रस्ता (स्टेट बँक ऑफ इंडिया) ते मिलिंद नगर
- डीलक्स थिएटर रस्ता ते नऊ मीटर रस्त्यापर्यंत
- रवी सोसायटी ते अशोक थिएटर
'गावठाण' दर्जाची मागणी: पिंपरी कॅम्प या परिसराला "गावठाण" म्हणून घोषित करून गावठाणाच्या सेवा आणि सुविधा द्याव्यात, अशीही मागणी या पत्रात करण्यात आली आहे.

व्यापाऱ्यांची उपस्थिती

यावेळी व्यापारी सुरेश शर्मा, जगदीश आसवाणी, आकाश बजाज, सावल तोताणी, नीरज चावला, रमेश जधवाणी, दीपक सोनाजी, अर्जुन मेलवाणी, जयराम नागदेव, सुनील हिंगोराणी, रवी गोरवाणी, अवि तेजवाणी आदी उपस्थित होते.

फेडरेशनने असेही म्हटले आहे की, मागील अनेक वर्षांपासूनची पिंपरी कॅम्प परिसराला गावठाणाचा दर्जा देण्याची मागणी पूर्ण करून येथील रहिवासी व व्यापाऱ्यांना न्याय द्यावा.