वारीमध्ये 'अर्बन नक्षलवाद' आणि नास्तिकतावादाचा शिरकाव सहन करणार नाही! - समस्त वारकरी संप्रदाय व संघटनांचा एल्गार (VIDEO)

तीर्थक्षेत्रे कायमस्वरूपी मद्य-मांस मुक्त करा; आषाढीपर्यंत वाट पाहू, अन्यथा भूमिका जाहीर करू : बंडातात्या कराडकर

पुणे, २१ जून २०२५: महाराष्ट्राच्या सामाजिक, सांस्कृतिक आणि आध्यात्मिक परंपरेचा अविभाज्य भाग असलेल्या पंढरपूरच्या पवित्र वारीमध्ये नास्तिकतावाद आणि 'अर्बन नक्षलवादा'चा अजेंडा राबवण्याचा प्रयत्न सुरू असल्याचा गंभीर आरोप समस्त वारकरी संप्रदाय आणि संघटनांनी केला आहे. "तीर्थक्षेत्र, देवता, संत, अभंग आणि पवित्र वारी यांचा अवमान सहन करणार नाही," असा स्पष्ट इशारा देत, या अपप्रवृत्तींवर सरकारने गांभीर्याने लक्ष देऊन कठोर कारवाई करावी, अशी मागणी वारकरी संप्रदायाने केली आहे.

पुणे येथील श्रमिक पत्रकार भवनात आयोजित पत्रकार परिषदेत ज्येष्ठ कीर्तनकार संतवीर बंडातात्या कराडकर, हिंदु जनजागृती समितीचे महाराष्ट्र आणि छत्तीसगड राज्य संघटक सुनील घनवट यांच्यासह महाराष्ट्र वारकरी महामंडळाचे सचिव ह.भ.प. नरहरी महाराज चौधरी, श्रीक्षेत्र देहूचे माजी अध्यक्ष ह.भ.प. नितीन मोरे महाराज, ह.भ.प. वैभव महाराज मोरे, संत सोपानकाका पालखी सोहळा दिंडी समाज अध्यक्ष ह.भ.प. राम महाराज कदम, अखिल भारतीय संत समितीचे प्रदेश महामंत्री स्वामी भारतानंद सरस्वती महाराज, महाराष्ट्र वारकरी महामंडळाच्या कोकण प्रांताध्यक्ष ह.भ.प. भगवान महाराज कोकरे, राष्ट्रीय वारकरी परिषदेचे कार्याध्यक्ष ह.भ.प. बापू महाराज रावकर, श्री संत तुकाराम महाराज संस्थान, चिंतामणी प्रासादिक दिंडींचे ह.भ.प. दत्तात्रय चोरगे महाराज आणि अन्य संत-महंत उपस्थित होते.

'अर्बन नक्षलवाद' आणि धर्मद्रोहाचा आरोप:

पंतप्रधान नरेंद्र मोदी आणि मुख्यमंत्री देवेंद्र फडणवीस यांनी शहरी नक्षलवादाविरोधात कठोर भूमिका घेतल्याचे नमूद करत, पत्रकार परिषदेत 'अंधश्रद्धा निर्मूलन समिती (अंनिस)', 'कबीर कला मंच' यांसह काही 'पुरोगामी' संघटनांवर गंभीर आरोप करण्यात आले. "समरसता आणि प्रबोधनाच्या नावाखाली वारीत घुसखोरी करून संत साहित्य, अभंग आणि वारकरी श्रद्धास्थानांविषयी अपप्रचार केला जात आहे. नक्षलवादी कारवायांमध्ये ज्यांचे कार्यकर्ते पकडले आहेत, अशा या संघटनांवर 'अर्बन नक्षलवादा'चे गुन्हे नोंद आहेत. ही बाब शासन-प्रशासनाने गांभीर्याने घेऊन त्यांच्यावर कारवाई करावी," अशी मागणी करण्यात आली. युवा वारकरी या गैरप्रकारांवर लक्ष ठेवतील, परंतु सरकारनेही कठोर भूमिका घ्यावी, असे आवाहन बंडातात्या कराडकर यांनी केले.

प्रमुख मागण्या:

हिंदु जनजागृती समितीचे सुनील घनवट यांनी इंद्रायणी-चंद्रभागा नद्यांच्या प्रदूषणाचा मुद्दा उपस्थित करत, वारकऱ्यांच्या तीर्थक्षेत्री कायमस्वरूपी मद्य-मांस विक्री बंद करण्याची मागणी केली. "वारीच्या माध्यमातून अंनिस, कबीर कला मंच आणि पुरोगामी संघटना छुपा अजेंडा राबवत आहेत. त्यांच्यावर कठोर कारवाई व्हावी," असे त्यांनी म्हटले.

संतवीर बंडातात्या कराडकर: "वारकरी संप्रदाय कुणाचाही द्वेष करत नाही, पण वाघाचे कातडे पांघरून वारकऱ्यांना फसवणाऱ्यांना आम्ही सहन करणार नाही. वारकरी संप्रदायाची बदनामी करणाऱ्यांना वारीत प्रतिबंध घालावा." त्यांनी आषाढीपर्यंत मागण्या मान्य न झाल्यास पुढील भूमिका जाहीर करण्याचा इशारा दिला. मुख्यमंत्र्यांनी दिलेले कत्तलखाना होणार नाही हे आश्वासन लेखी स्वरूपात येईपर्यंत मान्य करणार नसल्याचेही त्यांनी स्पष्ट केले.
ह.भ.प. नितीन महाराज मोरे: "देहूप्रमाणे वारकऱ्यांच्या सर्व तीर्थक्षेत्री कायमस्वरूपी मद्य-मांस मुक्त करावीत. साधू-संतांवर टीका करणाऱ्यांवर शासनाने त्वरित कारवाई करावी."
ह.भ.प. नरहरी महाराज चौधरी: "वारकरी संप्रदाय शांत आहे, पण वारीत धर्मांतरासारखे प्रयत्न करणाऱ्यांना जशास-तसे उत्तर देऊ. तीर्थक्षेत्रे कायमस्वरूपी मद्य-मांसमुक्त झाली पाहिजेत."
ह.भ.प. राम महाराज कदम: "वारकरी संप्रदायाचे ग्रंथ आणि संतांवर शिंतोडे उडवणाऱ्यांविरोधात सरकारने त्वरित कायदा करावा. संतांवर टीका करणाऱ्यांवर 'ईशनिंदा विरोधी' कायदा लागू करावा."
स्वामी भारतानंद सरस्वती महाराज: "सरकारला इंद्रायणी, आळंदीचे महत्त्व सांगावे लागते हे दुर्दैव. अंनिस, कबीर कला मंचसारख्या संस्था वारकऱ्यांची फसवणूक करत आहेत. सरकारने हे थांबवावे, अन्यथा जनचळवळ उभारली जाईल."
ह.भ.प. भगवान महाराज कोकरे: "वारीमध्ये जातीयता पसरवणाऱ्यांचा बुरखा फाडण्यासाठी आम्ही प्रयत्नरत राहू. प्रदूषण, धर्मांतरण, ईशनिंदा याविषयी सरकारने कठोर कायदा करावा."

या पत्रकार परिषदेमुळे वारीच्या पवित्र परंपरेतील कथित गैरप्रकारांवर पुन्हा एकदा प्रकाशझोत पडला असून, सरकारकडून ठोस कारवाईची अपेक्षा वारकरी संप्रदायाकडून व्यक्त केली जात आहे.

---------------------------------------------------------------------------------------------------------------------

Pune, Warkari Sampraday, Pandharpur Wari, Interfaith Harmony, Atheism, Urban Naxalism, Press Conference, Bandatatya Karadkar, Sunil Ghanwat, Andhashraddha Nirmoolan Samiti (ANIS), Kabir Kala Manch, Pilgrimage Sites, Liquor Ban, Meat Ban, Indrayani River, Chandrabhaga River, Defamation, Religious Conversion, Social Harmony, Devendra Fadnavis.

#Warkari #PandharpurWari #Pune #UrbanNaxalism #ReligiousHarmony #Hinduism #Maharashtra #BandaTatyaKaradkar #SocialIssues #YogaDay