पुण्यात २१ जून रोजी 'वारकरी भक्तीयोग' कार्यक्रम; जागतिक योगदिनानिमित्त मुख्यमंत्री फडणवीस उपस्थित राहणार

पुणे, १८ जून २०२५: जागतिक योगदिनाचे औचित्य साधून शुक्रवार, २१ जून रोजी सावित्रीबाई फुले पुणे विद्यापीठासह शहरातील विविध शाळांमध्ये 'वारकरी भक्तीयोग' कार्यक्रमाचे आयोजन करण्यात येणार आहे. या कार्यक्रमाचे काटेकोर नियोजन करून तो यशस्वी करण्यासाठी जिल्हा प्रशासन, पुणे महानगरपालिका, पोलीस प्रशासन, विविध सामाजिक संस्था आणि स्वयंसेवक यांनी पुढाकार घ्यावा, असे निर्देश राज्याचे उच्च व तंत्रशिक्षण मंत्री चंद्रकांत पाटील यांनी प्रशासनास दिले.

जिल्हाधिकारी कार्यालयात बैठकीचे आयोजन; महत्त्वाचे अधिकारी उपस्थित

या संदर्भात जिल्हाधिकारी कार्यालयात आयोजित बैठकीत पुणे महानगरपालिका आयुक्त नवल किशोर राम, पोलीस सह आयुक्त रंजनकुमार शर्मा, जिल्हाधिकारी जितेंद्र डुडी, अतिरिक्त पोलीस आयुक्त मनोज पाटील, सावित्रीबाई फुले पुणे विद्यापीठाचे कुलगुरु डॉ. सुरेश गोसावी, जिल्हा क्रीडा अधिकारी जगन्नाथ लकडे आदी उपस्थित होते.

सकाळी ७.३० वाजता 'वारकरी भक्तीयोग'; मुख्यमंत्री देवेंद्र फडणवीस यांची उपस्थिती

मंत्री पाटील यांनी माहिती दिली की, जागतिक योगदिनानिमित्त सावित्रीबाई फुले पुणे विद्यापीठ येथे सकाळी ७.३० वाजता 'वारकरी भक्तीयोग' कार्यक्रमाचे आयोजन करण्यात येणार आहे. या कार्यक्रमास मुख्यमंत्री देवेंद्र फडणवीस यांच्यासह विविध मान्यवर आणि वारकरी सहभागी होऊन योग करणार आहेत. विद्यापीठाने या कार्यक्रमासाठी पूर्व तयारी करावी, असे निर्देश त्यांनी दिले.

शाळांमधील आयोजनासाठी सोयीसुविधा देण्याचे निर्देश

शहरातील विविध शाळांमध्येदेखील 'वारकरी भक्तीयोग' आयोजित करण्यात येणार आहे. यामध्ये सहभागी होणाऱ्या वारकरी आणि स्वयंसेवकांसाठी बसण्याची योग्य जागा, ओळखपत्र, एकसारखे टी-शर्ट, पिण्याचे पाणी, स्वच्छतागृहे आदी सुविधा उपलब्ध करून देण्याच्या सूचना देण्यात आल्या. शाळांमध्ये योगासाठी लागणाऱ्या सर्व सुविधा महानगरपालिकेने उपलब्ध करून द्याव्यात, असेही पाटील यांनी सांगितले.

थेट प्रक्षेपण आणि व्यापक जनजागृतीवर भर

'वारकरी भक्तीयोग' कार्यक्रमाचे थेट प्रक्षेपण (Live Telecast) करण्यात यावे. यासाठी क्यूआर कोड (QR Code), फेसबुक लाईव्ह (Facebook Live) चा वापर करावा. अधिकाधिक वारकरी सहभागी होतील यासाठी व्यापक जनजागृती करावी, तसेच शहरातील विविध भागांमध्ये, विशेषतः दिंडीच्या मुक्कामाच्या ठिकाणी आणि मार्गांवर महानगरपालिकेने जाहिरात फलके लावावीत, असे निर्देश मंत्री पाटील यांनी दिले. वारकऱ्यांची कोणतीही गैरसोय होणार नाही, याची दक्षता घ्यावी, अशी सूचनाही त्यांनी केली.

यावेळी आयुक्त राम, जिल्हाधिकारी डुडी आणि कुलगुरु डॉ. गोसावी यांनी कार्यक्रम यशस्वीपणे पार पाडण्यासाठी योग्य नियोजन करून कार्यवाही करण्यात येईल, असे सांगितले. कार्यक्रमाचे संयोजक व संकल्पक राजेश पांडे यांनी 'वारकरी भक्तीयोग' नियोजनाबाबत सविस्तर माहिती दिली.

Pune, International Yoga Day, Warkari Bhaktiyog, Chandrakant Patil, Devendra Fadnavis, Savitribai Phule Pune University, Yoga Program, Maharashtra Government, District Administration, Public Event.
#Pune #YogaDay #WarkariBhaktiyog #ChandrakantPatil #DevendraFadnavis #Yoga #Maharashtra #InternationalYogaDay #PuneUniversity.