चाकणमध्ये मटका अड्ड्यावर छापा, चौघे ताब्यात; ३५ हजारांचा मुद्देमाल जप्त

 

पिंपरी-चिंचवड, दि. ४ जून: चाकण येथील मार्केट यार्ड परिसरात सुरू असलेल्या कल्याण, मिलन व टाईम बझार नावाच्या मटका अड्ड्यावर गुन्हे शाखेच्या मालमत्ता गुन्हे विरोधी पथकाने छापा टाकला. या कारवाईत पोलिसांनी चौघांना ताब्यात घेतले असून, त्यांच्याकडून रोख रक्कम आणि जुगाराचे साहित्य असा एकूण ३५ हजार ७८० रुपयांचा मुद्देमाल जप्त केला आहे.

काय आहे घटना?

ही कारवाई मंगळवारी (दि. ३) दुपारी सव्वा वाजण्याच्या सुमारास चाकणमधील मार्केट यार्ड येथील जे. के. बिअर बारच्या मागे असलेल्या राम महादू गोरे यांच्या खोलीत करण्यात आली. गुन्हे शाखेला या ठिकाणी मटका जुगार सुरू असल्याची गुप्त माहिती मिळाली होती. त्यानुसार पथकाने छापा टाकला असता, आरोपी मटका जुगार खेळताना आणि खेळवताना रंगेहाथ सापडले.

चौघे ताब्यात, मालक फरार

पोलिसांनी १) गणीभाई इब्राहिम आधार (वय ८०, रा. जामा मशिदीमागे, चाकण), २) संतोष सखाराम पवार (वय ३७, रा. आंबेडकर नगर, चाकण), ३) बाबु रंगनाथ वाघोळे (वय ३२, रा. यशवंत नगर, चाकण) आणि ४) समीर शरद फडतरे (वय २८, रा. खराबवाडी, चाकण) या चौघांना ताब्यात घेतले आहे. हे चौघे जण त्यांचा मालक कार्तिक गोतारणे (रा. चाकण) याच्या सांगण्यावरून मटका जुगार चालवत असल्याचे तपासात समोर आले आहे. मालक कार्तिक गोतारणे हा फरार असून पोलीस त्याचा शोध घेत आहेत.

याप्रकरणी पोलीस शिपाई अमर शांताराम कदम (ब.नं. २८६५, मालमत्ता गुन्हे विरोधी पथक, गुन्हे शाखा, पिंपरी-चिंचवड) यांनी चाकण पोलीस ठाण्यात फिर्याद दिली आहे. पोलिसांनी आरोपींविरुद्ध गुन्हा दाखल केला आहे. पुढील तपास पोलीस हवालदार यादव करत आहेत.