पुणे, ३० जून २०२५: पुण्याचं ऐतिहासिक वैभव असलेल्या विश्रामबागवाड्याचा दर्शनी भाग येत्या जुलै महिन्याच्या अखेरीस नागरिकांसाठी पूर्णपणे खुला करण्यात येणार आहे. पुणे महानगरपालिकेचे मुख्य अभियंता युवराज देशमुख यांनी ही माहिती दिली असून, क्रिएटिव्ह फाउंडेशनचे अध्यक्ष संदीप खर्डेकर यांच्या पाठपुराव्याला या यशाचं श्रेय दिलं जात आहे.
ऐतिहासिक विश्रामबागवाडा:
१७५० साली बाजीराव पेशवे (दुसरे) यांनी हरी पंत भाऊ फडके यांच्याकडून विकत घेतलेला आणि १८१० मध्ये भव्य स्वरूपात बांधलेला विश्रामबागवाडा हा पुणे शहराच्या इतिहासाचा एक महत्त्वाचा भाग आहे. १८२० मध्ये पेशव्यांनी वाडा रिकामा केल्यानंतर येथे वेदशाळा आणि पुढे डेक्कन कॉलेज सुरू करण्यात आले. १८८० मध्ये वाड्याचा पूर्वेकडील भाग आगीत जळाला होता. १९३० ते १९६० या काळात पुणे महानगरपालिकेचे कार्यालयही येथे स्थलांतरित झाल्याचे उल्लेख आढळतात. साधारण १९९० मध्ये या वाड्याचे संवर्धन करून हा ऐतिहासिक वारसा जपण्यात आला.
संवर्धन कामातील आव्हाने आणि यश:
गेल्या दोन वर्षांपासून पुणे मनपाच्या प्रकल्प विभागांतर्गत येणाऱ्या हेरिटेज सेलद्वारे या वाड्याचे जतन व संवर्धनाचे (Restoration) काम सुरू होते. हे काम पूर्ण होण्यास होत असलेल्या विलंबाबद्दल क्रिएटिव्ह फाउंडेशनचे अध्यक्ष संदीप खर्डेकर यांनी प्रशासनास आंदोलनाची भूमिका घेण्याबाबत कळवले होते. यानंतर मुख्य अभियंता युवराज देशमुख यांनी हेरिटेज सेलचे उप अभियंता आणि प्रकल्प प्रमुख सुनील मोहिते यांना संदीप खर्डेकर यांच्याशी संपर्क साधण्यास सांगितले. मोहिते यांनी प्रत्यक्ष जागेवर पाहणी केल्यानंतर स्पष्ट केले की, ऊन, वारा आणि पावसामुळे क्षतिग्रस्त झालेला वाड्याचा दर्शनी भाग मूळ स्वरूपात आणण्याचे काम यशस्वी झाले आहे.
श्री. मोहिते यांनी सांगितले की, "प्राचीन काळातील अत्यंत नाजूक कलाकुसर असलेली लाकडी महिरप आणि सज्जा त्याच स्वरूपात पुन्हा उभारणे हे काम अवघड होते. मात्र त्यावर कठोर मेहनत घेतल्यामुळे त्याचे मूळ स्वरूपात संवर्धन करणे शक्य झाले आणि म्हणूनच या कामाला वाजवीपेक्षा जास्त वेळ लागला."
सध्याची स्थिती आणि पुढील योजना:
या वाड्यातील दालन क्रमांक एक आणि दोनचे काम यापूर्वीच पूर्ण झाले असून, ते पर्यटकांसाठी खुले करण्यात आले आहेत. मात्र मुख्य दर्शनी भाग आता जुलैअखेर सुरू केला जाईल, असे श्री. मोहिते यांनी स्पष्ट केले. सध्या येथे एक पोस्ट ऑफिस आणि पुणे मनपा परिवहन महामंडळाचे पास केंद्र सुरू आहे. हा संपूर्ण वाडा अत्यंत प्रेक्षणीय आहे.
वाड्याच्या देखभालीबाबत मागणी:
संदीप खर्डेकर यांनी मनपा प्रशासनाने आपला शब्द पाळून जुलैअखेर वाडा नागरिकांसाठी आणि पर्यटकांसाठी खुला करावा, असा विश्वास व्यक्त केला आहे. तसेच, या "वाड्याचे" अन्य वास्तूप्रमाणे मनपानेच संचालन आणि देखभाल करावी किंवा पूर्वीप्रमाणे एखाद्या संस्थेस चालविण्यासाठी द्यावा, याबाबत त्वरित निर्णय घेऊन हा अमूल्य ठेवा नागरिकांना पाहण्यासाठी उपलब्ध करून द्यावा, अशी मागणीही त्यांनी केली आहे.
Heritage Site, Pune History, Restoration Project, Vishrambaug Wada, Pune Municipal Corporation, Tourism, Cultural Heritage
#VishrambaugWada #PuneHeritage #PuneTourism #RestorationProject #SandeepKhardekar #PMC #HistoricPune #CulturalLegacy #MaharashtraTourism
Reviewed by ANN news network
on
६/३०/२०२५ ०७:५९:०० PM
Rating:
कोणत्याही टिप्पण्‍या नाहीत: