रत्नागिरी जिल्ह्यात १ मे पासून आठ पक्की घरे पूर्णतः तर; ५२ अंशतः कोसळली

 

रत्नागिरी, दि. २६: रत्नागिरी जिल्ह्यात १ मे पासून  आतापर्यंतच्या नुकसानीच्या तपशिलानुसार, जिल्ह्यात आठ पक्की घरे पूर्णपणे कोसळली आहेत, ज्यामुळे १ लाख ९ हजार ८५० रुपयांचे नुकसान झाले आहे. सुदैवाने, कच्ची घरे पूर्णपणे कोसळल्याची कोणतीही घटना घडलेली नाही.

परंतु, अंशतः पडलेल्या पक्क्या घरांची संख्या ५२ असून, यामुळे २४ लाख ९९ हजार ३९४ रुपयांचे नुकसान झाले आहे. याव्यतिरिक्त, चार गोठे अंशतः पडले असून त्यात २ लाख ७ हजार २५० रुपयांचे नुकसान झाले आहे. दोन गोठे पूर्णपणे कोसळल्याने ३ लाख ७३ हजार ५० रुपयांचे नुकसान झाले आहे.

या नैसर्गिक आपत्तीत एका व्यक्तीचा बळी गेला आहे. लांजा येथे वीज पडून एका व्यक्तीचा दुर्दैवी मृत्यू झाला. यासोबतच, विविध घटनांमध्ये सहा जण जखमी झाले आहेत. रत्नागिरी तालुक्यातील काजरघाटी येथे भिंत कोसळल्याने तीन जण, तर गुहागर तालुक्यातील आबलोली येथे झाड पडल्याने तीन जण जखमी झाले आहेत.

जिल्हा प्रशासनाकडून नुकसानीचा आढावा घेतला जात असून, बाधित नागरिकांना तातडीने मदत पुरवण्यासाठी प्रयत्न सुरू आहेत.

--------------------------------------------------------------------------------------------

#RatnagiriRains #RainDamage #HouseCollapse #LightningDeath #Injuries #MaharashtraFloods #DisasterRelief #LossOfProperty