डीआरआयची मोठी कारवाई; २३.५ कोटींचे हेरोईन आणि मेथॅम्फेटामाइन जप्त, चौघे तस्कर अटकेत

गुवाहाटी: उत्तर-पूर्व भारतात अंमली पदार्थांची तस्करी आणि विक्री करणाऱ्यांविरुद्ध महसूल गुप्तचर संचालनालयाने (DRI) मोठी कारवाई केली आहे. या कारवाईत सुमारे २३.५ कोटी रुपये किमतीचे हेरोईन आणि मेथॅम्फेटामाइन जप्त करण्यात आले असून, चार तस्करांना अटक करण्यात आली आहे.

डीआरआयने १९ बटालियन आसाम रायफल्सच्या मदतीने २१ मे २०२५ रोजी राष्ट्रीय महामार्ग ३७ वर, नोनी, मणिपूर येथे एका ट्रकला थांबवून तपासणी केली. ट्रकमध्ये एक विशेष पद्धतीने बनवलेल्या गुप्त कप्प्यात ५६९ ग्रॅम हेरोईन आणि १,०३९ ग्रॅम मेथॅम्फेटामाइनच्या गोळ्या लपवलेल्या आढळल्या.

याचप्रमाणे, आसाम रायफल्स एफआययू युनिट सिलचरच्या मदतीने डीआरआयने २२ मे २०२५ रोजी हैलाकांडी जिल्हा, आसाममधील अलोचेरा येथे एका ट्रकला रोखून २,६४०.५३ ग्रॅम हेरोईन जप्त केले. या ट्रकमध्येही अंमली पदार्थ एका विशेष कप्प्यात लपवण्यात आले होते.

जप्त करण्यात आलेल्या अंमली पदार्थांची आंतरराष्ट्रीय बाजारात किंमत सुमारे २३.५ कोटी रुपये आहे. हे पदार्थ एनडीपीएस कायदा, १९८५ अंतर्गत जप्त करण्यात आले असून, चार जणांना अटक करण्यात आली आहे.

यावर्षी जानेवारीपासून, डीआरआयने उत्तर-पूर्व भारतात गांजा, मेथॅम्फेटामाइन गोळ्या आणि हेरोईन यांसारखे १७३ कोटी रुपये किमतीचे अंमली पदार्थ जप्त केले आहेत आणि २६ जणांना अटक केली आहे.