पोलीस अधिकाऱ्यावर भ्रष्टाचार प्रतिबंध कायद्यान्वये गुन्हा

चोरीच्या सोन्याच्या गुन्ह्यात अटक टाळण्यासाठी लाचेची मागणी

अहिल्यानगर : अहिल्यानगर जिल्ह्यातील एका पोलीस अधिकाऱ्यावर ७० हजार रुपयांची लाच मागितल्याचा गंभीर आरोप लागला आहे. भाऊसाहेब गोविंद काळे या सहाय्यक पोलीस उप निरीक्षक यांच्यावर भ्रष्टाचाराचा आरोप ठेवत लाचलुचपत प्रतिबंधक विभागाने भिंगार कॅम्प पोलीस स्टेशनमध्ये गुन्हा दाखल केला आहे.

या प्रकरणात आरोपी भाऊसाहेब गोविंद काळे हे एम.आय.डी.सी. पोलीस स्टेशन, अहिल्यानगर येथे कार्यरत असून त्यांच्यावर भ्रष्टाचार प्रतिबंध अधिनियम १९८८ चे कलम ७ अन्वये गुन्हा दाखल करण्यात आला आहे. गुन्हा नोंदवणी क्रमांक ३२३/२०२५ अन्वये ही कारवाई करण्यात आली आहे.

प्रकरणाची सविस्तर माहिती पाहता, तोफखाना पोलीस स्टेशनमधील गुन्हा नोंदवणी क्रमांक ५६९/२०२४ भारतीय दंड संहिता कलम ३९४, ३४ या गुन्ह्यामध्ये तक्रारदाराच्या भावाला चोरीचे सोने विकत घेतले या कारणावरून आरोप झाला होता. या पार्श्वभूमीवर आरोपी पोलीस अधिकारी भाऊसाहेब काळे यांनी तक्रारदाराच्या भावाला गुन्ह्यात अटक होऊ नये म्हणून त्यांच्याकडे ७० हजार रुपयांची लाच मागितली होती.

या प्रकरणी तक्रारदाराने लाचलुचपत प्रतिबंधक विभाग कार्यालय, अहिल्यानगर येथे तक्रार दाखल केली होती. त्यानंतर गेल्या ९ मे २०२४ रोजी लाच मागणी पडताळणी करण्यात आली. या पडताळणी दरम्यान आरोपी अधिकाऱ्याने पंचांसमक्ष तपासी अधिकाऱ्यांच्या नावाचा बेकायदेशीर प्रभाव वापरून सोन्याच्या रिकव्हरीऐवजी ७० हजार रुपयांची लाच मागितली आणि ती स्वीकारण्याची तयारी दर्शविली.

लाचलुचपत प्रतिबंधक विभागाने नागरिकांना आवाहन केले आहे की, भ्रष्टाचारासंबंधी काही माहिती असल्यास किंवा कोणत्याही लोकसेवकाकडून लाच मागण्यात आल्यास त्यांनी लगेच विभागाशी संपर्क साधावा.

संपर्कासाठी नागरिक ACB कार्यालय अहिल्यानगर, जिल्हा मध्यवर्ती प्रशासकीय इमारत, टी.व्ही. सेंटरसमोर, सावेडी येथे संपर्क साधू शकतात. तसेच acbmaharashtra.gov.in या संकेतस्थळावर, acbwebmail@mahapolice.gov.in या ई-मेलवर, १०६४ या टोल फ्री नंबरवर किंवा ०२४१-२४२३६७७ या दूरध्वनी क्रमांकावर संपर्क साधता येईल. तसेच व्हॉट्सअप नंबर ९९३०९९७७०० यावरही संपर्क साधू शकतात.

या प्रकरणाची पुढील तपासणी राजू आल्हाट, पोलीस निरीक्षक, अँटी करप्शन ब्युरो, अहिल्यानगर यांच्या नेतृत्वाखाली सुरू आहे.