कारागृहातील आधुनिक सुविधांची पाहणी
मंत्री कदम यांनी कारागृहातील स्वयंपाकगृह, हॉस्पिटल विभाग, कम्युनिटी रेडिओ केंद्र, व्हिडिओ कॉन्फरन्सिंग कक्ष, ई-मुलाखत कक्ष, लिगल एड क्लिनिक, अति सुरक्षा विभाग आणि विशेष सुरक्षा विभागासह सर्व बंदी बॅरेकची प्रत्यक्ष पाहणी केली. त्यांनी बंदीवानांच्या आहार व्यवस्था, उपहारगृह, नातेवाईक आणि वकिलांशी संपर्कासाठी उपलब्ध स्मार्टकार्ड टेलिफोन सुविधेचीही माहिती घेतली.
तंत्रज्ञानावर आधारित सुरक्षा व्यवस्था
कारागृहात कार्यान्वित केलेली AI आधारित CCTV यंत्रणा, पॅनिक अलार्म प्रणाली, ई-प्रिझन्स प्रणाली आणि पब्लिक अॅड्रेसिंग सिस्टमची विस्तृत माहिती मंत्र्यांना देण्यात आली. बंदीवानांच्या न्यायालयीन कामकाजाची दैनंदिन अद्ययावत माहिती, खाजगी रक्कमेची माहिती आणि मुलाखत संबंधी सेवांसाठी सुरू करण्यात आलेली ई-किऑस्क सुविधेचीही पाहणी झाली.
नवीन बांधकाम प्रकल्पांची माहिती
शासन आणि जिल्हा नियोजन समितीमार्फत उपलब्ध झालेल्या निधीतून कारागृहात सुरू असलेल्या नूतनीकरण कामांची पाहणी करण्यात आली. यामध्ये मुख्य प्रवेशद्वार सुशोभीकरण, व्हिडिओ कॉन्फरन्सिंग कक्ष, उपहारगृह इमारत, जेल कोर्ट, सर्कल क्रमांक १२ आणि १ तसेच हॉस्पिटल विभागाच्या बांधकामाचा समावेश आहे.
बंदीवानांच्या समस्यांची दखल
मंत्री कदम यांनी कारागृहातील बंदीवानांच्या अडचणी आणि विनंत्या जाणून घेतल्या. त्यांच्या निवारणासाठी संबंधित विभागातील अधिकाऱ्यांना मार्गदर्शन केले. कारागृह अधिकारी आणि कर्मचाऱ्यांच्या समस्यांबाबतही चौकशी करून शासन स्तरावर त्वरित पाठपुरावा करण्याचे आश्वासन दिले.
पत्रकार परिषदेत महत्त्वाची माहिती
दुपारी १२.३० वाजता रिझर्व्ह गार्ड परिसरात पत्रकार परिषद घेऊन मंत्री कदम यांनी कारागृहातील सुविधा, प्रशासकीय आव्हाने आणि बंदीवानांच्या गर्दीच्या समस्येवर शासनाच्या उपाययोजनांची सविस्तर माहिती दिली. पत्रकारांच्या इतर प्रश्नांनाही त्यांनी समाधानकारक उत्तरे दिली.
भेटीदरम्यान अपर पोलीस महासंचालक डॉ. सुहास वारके, कारागृह उपमहानिरीक्षक योगेश देसाई, अधीक्षक हर्षद अहिरराव, पोलीस उपायुक्त दत्तात्रय कांबळे यांसह अनेक वरिष्ठ अधिकारी उपस्थित होते.
कोणत्याही टिप्पण्या नाहीत:
टिप्पणी पोस्ट करा