भुकुममध्ये होर्डिंग कोसळले; पीएमआरडीएच्या कारवाईवर नागरिकांचा सवाल

 

पुणे: होर्डिंग कोसळून मृत्यूच्या घटना घडल्यानंतर शासकीय यंत्रणा तात्पुरती सक्रिय होते, मात्र काही दिवसांतच परिस्थिती ‘जैसे थे’ होते, असा अनुभव पुन्हा एकदा पुणे महानगर प्रदेश विकास प्राधिकरणाच्या (पीएमआरडीए) हद्दीत येत आहे. मुळशी तालुक्यातील भुकुम येथे गुरुवारी जोरदार वाऱ्यामुळे दोन मोठे होर्डिंग कोसळल्याने अनधिकृत होर्डिंगचा धोका पुन्हा समोर आला आहे.

नागरिकांकडून सवाल विचारला जात आहे की, अशा दुर्घटनेत कोणाचा जीव गेल्यावरच पीएमआरडीएला जाग येणार का? गेल्या वर्षी मुंबईतील घाटकोपर येथे होर्डिंग दुर्घटनेत १७ तर एप्रिल २०२३ मध्ये किवळे येथे ५ जणांचा बळी गेला होता. यानंतर प्रशासनाने केलेल्या सर्वेक्षणात पीएमआरडीएच्या हद्दीतील १० तालुक्यांमध्ये १,४४० होर्डिंग आढळले, ज्यापैकी केवळ २७ अधिकृत होते, तर ८७ धोकादायक घोषित करण्यात आले होते.

जवळपास दीड हजार अनधिकृत होर्डिंग मालकांना नोटिसा बजावण्यात आल्या आणि सुमारे १७० जणांवर गुन्हे दाखल झाले. मात्र, त्यानंतर केवळ काही होर्डिंग्ज पाडण्यात आली आणि कारवाई थंडावली. आता पुन्हा अनधिकृत होर्डिंग शहरात दिसत असल्यामुळे पीएमआरडीए अधिकाऱ्यांचा या व्यावसायिकांवर वचक नसल्याचे स्पष्ट होत आहे.

धोकादायक होर्डिंगमुळे मोठी दुर्घटना होण्याची शक्यता असूनही प्रशासनाकडून याकडे दुर्लक्ष केले जात असल्याचा नागरिकांचा आरोप आहे. अधिकारी केवळ घटना घडल्यानंतर कारवाईचे आश्वासन देतात, परंतु प्रत्यक्षात कार्यवाही होत नाही, ज्यामुळे नागरिकांच्या जीवाला धोका निर्माण झाला आहे.

---------------------------------------

#पुणे 

#पीएमआरडीए 

#होर्डिंग 

#अनधिकृतहोर्डिंग 

#दुर्घटना 

#भुकुम 

#किवळे 

#घाटकोपर 

#निष्काळजीपणा 

#Pune 

#PMRDA 

#Hoarding 

#IllegalHoarding 

#Accident 

#Bhukum 

#Kivale 

#Ghatkopar 

#Negligence 

#Citizens