दीप्ती भोगले,डॉ.राम साठ्ये यांच्यासह एकूण ६ नाट्यकर्मींचा गौरव
पुणे : अखिल भारतीय मराठी नाट्य परिषद, पुणे शाखेतर्फे मराठी रंगभूमी दिनानिमित्त २५ नोव्हेंबर २०२४ रोजी पारितोषिक वितरण समारंभ आयोजित करण्यात येत आहे. या विशेष कार्यक्रमात ६ नाट्यकर्मींचा गौरव करण्यात येणार आहे. दीप्ती भोगले, डॉ. राम साठ्ये, माया धर्माधिकारी, अंजली जाखडे, विनोद धोकटे आणि सौ. स्वाती विनोद धोकटे यांना विविध पुरस्कारांनी सन्मानित केले जाणार आहे. परिषद अध्यक्ष मेघराज राजेभोसले यांनी पत्रकाद्वारे या कार्यक्रमाबाबत माहिती दिली आहे.
हा कार्यक्रम पं. जवाहरलाल नेहरू सांस्कृतिक भवन, घोले रस्ता, पुणे येथे सायं ५ ते ७ या वेळेत होणार आहे. या कार्यक्रमास सर्व सभासद तसेच रसिक प्रेक्षकांना प्रवेश विनामूल्य आहे.
पुरस्कार वितरण सोहळ्यात प्रमुख पाहुणे म्हणून ज्येष्ठ नेते उल्हास (दादा) पवार, राष्ट्रवादी काँग्रेस पार्टीचे पुणे शहराध्यक्ष दीपक मानकर, तसेच सुर्यदत्ता एज्युकेशन फाउंडेशनचे संस्थापक अध्यक्ष संजय चोरडिया यांची उपस्थिती असेल. याशिवाय नाट्यसिनेसृष्टीतील अनेक दिग्गज कलाकार देखील या कार्यक्रमात सहभागी होणार आहेत. कार्यक्रमात 'लोकरंग २०२४' या नाट्यमहोत्सवाचे सादरीकरण होणार आहे.
पुरस्कार वितरणाच्या निमित्ताने विविध नाट्यकर्मींच्या योगदानाचा सन्मान करण्यात येणार आहे. यामध्ये कै. जयंतराव टिळक स्मृती गौरव पुरस्कार दीप्ती भोगले यांना देण्यात येईल. कै. चित्तरंजन कोल्हटकर पुरस्कार डॉ. राम साठ्ये यांना प्रदान केला जाईल. माता जानकी जीवन गौरव पुरस्कार माया धर्माधिकारी यांना दिला जाईल, तर लक्ष्मी - नारायण दांपत्य पुरस्कार विनोद धोकटे आणि सौ. स्वाती विनोद धोकटे यांना प्रदान करण्यात येईल. अंजली जाखडे यांना प्रपंचलक्ष्मी पुरस्काराने सन्मानित केले जाईल.
राष्ट्रवादी काँग्रेस पार्टीचे पुणे शहराध्यक्ष दीपक मानकर यांच्या मातोश्री स्व. मालतीताई माधवराव मानकर यांच्या स्मरणार्थ १० गरजू रंगकर्मींना अर्थसहाय्य वितरित करण्यात येणार आहे.
पुरस्कार आणि पुरस्कारार्थींची यादी
१)कै. जयंतराव टिळक स्मृती गौरव पुरस्कार – मा. दीप्ती भोगले
२) माता जानकी जीवन गौरव पुरस्कार – श्रीमती माया धर्माधिकारी
३) प्रपंचलक्ष्मी पुरस्कार – अंजली जाखडे
४) लक्ष्मी – नारायण दांपत्य पुरस्कार – श्री. विनोद धोकटे आणि सौ. स्वाती विनोद धोकटे
५) कै. चित्तरंजन कोल्हटकर पुरस्कार – डॉ. राम साठ्ये
अखिल भारतीय मराठी नाट्य परिषदेच्या या उपक्रमामुळे पुण्यातील नाट्यकर्मींच्या योगदानाचा सन्मान करण्यात येत असून, मराठी रंगभूमीला एक नवीन उर्जा मिळत आहे.

कोणत्याही टिप्पण्या नाहीत: