नवरात्रोत्सवानिमित्त कसबा मतदारसंघात हेमंत रासने यांच्या पुढाकाराने महिलांसाठी मेट्रो सफर अन् महाभोंडल्याचे आयोजन!

 

संगम पारंपारिक संस्कृती अन् आधुनिक विकासाचा!

पुणे  : भारतीय जनता पार्टीच्या कसबा मतदारसंघाच्या वतीने कसबा विधानसभा निवडणूक प्रमुख हेमंत रासने यांच्या पुढाकाराने नवरात्रोत्सवाच्या निमित्ताने एक आगळावेगळा आणि प्रेरणादायी उपक्रम आज पार पडला. यामध्ये महिलांसाठी मोफत मेट्रो सफर, महाभोंडला, आणि कन्यापूजन अशा पारंपारिक आणि सांस्कृतिक कार्यक्रमांचे आयोजन करण्यात आले होते. या विशेष कार्यक्रमाचे उद्दिष्ट महिलांना एकत्र आणून त्यांच्यासाठी एक उत्साही आणि प्रेरणादायी अनुभव निर्माण करणे हे होते.

महात्मा फुले मंडई मेट्रो स्टेशन ते शिवाजीनगर दरम्यान महिलांसाठी मोफत मेट्रो प्रवासाची सुविधा देण्यात आली होती. हेमंत रासने यांच्या पुढाकाराने पुणे मेट्रो व्यवस्थापनाच्या सहकार्याने हा प्रवास महिलांसाठी मोफत करण्यात आला. यामुळे अनेक महिलांना प्रथमच मेट्रो प्रवासाचा अनुभव मिळाला. महिलांचा उत्साह आणि आनंद यामुळे मेट्रो प्रवासाच्या अनुभवाला एक वेगळा आनंद मिळाला.

मेट्रो प्रवासानंतर पारंपारिक महाभोंडला आणि कन्यापूजन सोहळ्याचे आयोजन करण्यात आले होते. महाभोंडला हा महिलांचा पारंपारिक नवरात्रोत्सव साजरा करण्याचा एक महत्त्वपूर्ण भाग आहे, जिथे महिलांनी एकत्र येऊन गाणी गायली, नृत्य सादर केले, आणि एकमेकांसोबत पारंपारिक खेळ खेळले. यामध्ये महिलांचा उत्साह ओसंडून वाहत होता, आणि या सोहळ्याने त्यांच्यात एकोपा वाढवला.

यानंतर झालेल्या कन्यापूजन सोहळ्यात लहान मुलींचे देवीच्या रूपात पूजन करण्यात आले. हा सोहळा स्त्रीशक्तीचा सन्मान करण्याच्या उद्देशाने आयोजित करण्यात आला होता. स्त्रिया समाजाची मुख्य ताकद आहेत, त्यांचा सन्मान करणे आणि त्यांच्या योगदानाचे महत्त्व पटवून देणे आपल्या संस्कृतीचा अविभाज्य भाग आहे, असे हेमंत रासने यांनी या कार्यक्रमाच्या निमित्ताने सांगितले.

हेमंत रासने म्हणाले, "नवरात्रोत्सव ही एक अशी वेळ आहे, ज्यामध्ये आपण आपली सांस्कृतिक परंपरा जपत आधुनिकतेचा स्वीकार करू शकतो. या कार्यक्रमाने पारंपारिक आणि आधुनिकतेचा संगम साधला आहे. महिलांना मेट्रोसारख्या अत्याधुनिक सुविधा अनुभवण्याची संधी मिळाली, तसेच पारंपारिक उत्सव साजरे करत त्यांच्या कर्तृत्वाचा सन्मान केला गेला."

या अभूतपूर्व सोहळ्याला भारतीय जनता पार्टी महिला मोर्चा शहराध्यक्षा हर्षदा  फरांदे, पुणे शहर सरचिटणीस आणि कसबा महिला आघाडी प्रभारी भावना  गवळी, कसबा मतदारसंघाचे अध्यक्ष राजेंद्र काकडे, सरचिटणीस राणी  कांबळे, वैशाली  नाईक, उमेश चव्हाण, अमित कंक, चंद्रकांत पोटे, प्रणव गंजीवाले, राजू परदेशी, प्रशांत सुर्वे,  महिला मोर्चा अध्यक्षा अश्विनी पवार, युवा मोर्चा अध्यक्ष, निर्मल हरिहर, प्रभाग अध्यक्ष भारत जाधव, सनी पवार, अभिजित रजपूत, उमेश दुरंडे, महिला मोर्चा सरचिटणीस दिपाली मारटकर, वर्षा धोंगडे, रागिणी खडके, कल्याणी नाईक, योगिता गोगावले, भाग्यश्री हजारे, महिला प्रभाग अध्यक्ष रुपाली कदम, सुनीता जंगम, तनुजा नाईक, अनघा दिवाणजी, मंजु शर्मा, शैलजा पाठक यांच्यासह माता-भगिनी मोठ्या संख्येने उपस्थित होत्या. तसेच या कार्यक्रमास महिलांनी मोठ्या संख्येने हजेरी लावली होती. भारतीय जनता पार्टीचे प्रमुख पदाधिकारी आणि कार्यकर्तेही या कार्यक्रमात सहभागी झाले होते.