पिंपरी चिंचवड शहरातील खड्डे बुजवा; अन्यथा आंदोलन : विनोद वरखडे

 

पिंपरी : शहरातील मुख्य रस्त्यांवरील मोठ्या प्रमाणावरील खड्ड्यांमुळे नागरिकांना गंभीर समस्यांना तोंड द्यावे लागत असून, या परिस्थितीकडे लक्ष वेधण्यासाठी राष्ट्रवादी काँग्रेस पक्षाच्या वाहतूक सेलने महापालिका आयुक्तांना निवेदन दिले आहे.

राष्ट्रवादी काँग्रेस पक्षाच्या वाहतूक सेलचे पिंपरी-चिंचवड शहर (जिल्हा) अध्यक्ष विनोद वरखडे यांनी दिलेल्या निवेदनात म्हटले आहे की, शहरातील प्रमुख रस्त्यांवर मोठ्या प्रमाणात खड्डे पडले असून, त्यामुळे नागरिकांना प्रवास करताना अनेक अडचणींना सामोरे जावे लागत आहे. या खड्ड्यांमुळे दररोज लहान-मोठे अपघात होत असून, नागरिकांच्या जीवाला धोका निर्माण झाला आहे.

निवेदनात पुढे म्हटले आहे की, रस्त्यांच्या दुरावस्थेमुळे उडणाऱ्या धुळीने नागरिकांच्या आरोग्याचा प्रश्न निर्माण झाला आहे. या पार्श्वभूमीवर महापालिकेने तातडीने रस्त्यांची दुरुस्ती (पॅचिंग) करावी, अशी मागणी या निवेदनाद्वारे करण्यात आली आहे.

महापालिका आयुक्त तथा प्रशासक शेखर सिंह यांना देण्यात आलेल्या या निवेदनावेळी सामाजिक कार्यकर्ते आप्पा दौंडे, भरत मोहोड यांच्यासह पक्षाचे अन्य कार्यकर्ते उपस्थित होते.

शहरातील रस्त्यांच्या दुरावस्थेकडे लक्ष वेधून, नागरिकांच्या सुरक्षिततेसाठी आणि आरोग्यासाठी तातडीने उपाययोजना करण्याची मागणी या निवेदनाद्वारे करण्यात आली आहे. महापालिका प्रशासनाकडून या समस्येवर लवकरच कारवाई होईल, अशी अपेक्षा व्यक्त करण्यात येत आहे.