कंपन्या फक्त कागदावर, 20 कोटींचा जीएसटी चुकवला, दोघांना अटक

पुणे: केंद्रीय वस्तू व सेवा कर (CGST) पुणे आयुक्तालयाच्या चोरी प्रतिबंधक पथकाने जीएसटी चोरीचे मोठे रॅकेट उघडकीस आणले आहे. फक्त कागदोपत्री अस्तित्वात असलेल्या कंपन्यांनी प्रत्यक्ष माल न देता केवळ बनावट बिले देऊन तब्बल 20 कोटी रुपयांचे अवैध इनपुट टॅक्स क्रेडिट घेतल्याचे निष्पन्न झाले आहे. या प्रकरणात दोन आरोपींना अटक करण्यात आली आहे.

पुण्यातील दोन मुख्य सूत्रधारांना या प्रकरणी अटक करण्यात आली आहे. औपचारिक आणि अनौपचारिक बँकिंग चॅनेलचा वापर करून या सिंडिकेटने सरकारची फसवणूक केल्याचे उघडकीस आले आहे. बनावट चलन व्यवहारात कंत्राटदारही गुंतलेले असल्याचे आढळून आले आहे.

सीजीएसटी विभागाच्या पथकाने मिळालेल्या गुप्त माहितीच्या आधारे ही कारवाई केली. बनावट बिले जारी करून अवैध इनपुट टॅक्स क्रेडिट पास करणाऱ्या विविध बनावट कंपन्यांविरुद्ध गुन्हे दाखल करण्यात आले आहेत. केवळ कागदावर असलेल्या या कंपन्या एका सिंडिकेटद्वारे चालवल्या जात होत्या. या सिंडिकेटमध्ये सरकारी कंत्राटदारांचाही समावेश आहे.

वस्तू आणि सेवांचा प्रत्यक्ष पुरवठा न करता खोटी बिले देऊन अवैध इनपुट टॅक्स क्रेडिट प्राप्त केले गेले. या प्रकरणात सरकारची एकूण 20 कोटी रुपयांची फसवणूक झाली. आतापर्यंत त्यापैकी 3.25 कोटी रुपयांची रक्कम वसूल करण्यात आली आहे.

फक्त कागदोपत्री अस्तित्वात असलेल्या कंपन्यांमार्फत जीएसटी चोरी करून सरकारची फसवणूक करणाऱ्या रॅकेटचा पर्दाफाश झाल्याने कर प्रणालीतील फसवणुकीला आळा बसण्यास मदत होईल. केंद्रीय वस्तू व सेवा कर विभागाने अशा प्रकारच्या गुन्ह्यांविरुद्ध कठोर पावले उचलण्याचे निर्देश दिले आहेत.