येत्या बजेटमध्ये पगारदार करदात्यांना मोठा दिलासा मिळण्याची शक्यता?

 

नवी दिल्ली : येत्या अर्थसंकल्पात पगारदार करदात्यांना दिलासा देण्याचा सरकार विचार करत आहे. यासाठी करप्रणालीमध्ये एक नवीन 'करटप्पा' (टॅक्सस्लॅब) निर्माण केला जाण्याची शक्यता आहे. करदात्यांना नवीन सवलत देऊन नवीन कर प्रणाली अधिक आकर्षक करण्यासाठी सरकारमध्ये चर्चा सुरू झाली आहे.

मिळालेल्या माहितीनुसार, नवीन करप्रणाली अंतर्गत नवीन स्लॅब सादर केला जाण्याची शक्यता आहे. वर्षाला ५  लाख रुपयांपर्यंत कमाई करणाऱ्या करदात्यांना, तसेच वार्षिक उत्पन्न १५ लाखांपेक्षा जास्त असलेल्यांना कमी कराच्या स्वरूपात दिलासा मिळण्याची अपेक्षा आहे.

करकपाती व्यतिरिक्त, सरकार आगामी अर्थसंकल्पात प्रक्रिया सुलभीकरणाशी संबंधित फायदे जाहीर करेल अशी अपेक्षा आहे. मात्र, या चर्चा अगदी सुरुवातीच्या टप्प्यात आहेत. अंतिम निर्णय पंतप्रधान कार्यालयस्तरावर घेतला जाईल, असे वृत्त आहे.

अर्थमंत्री निर्मला सीतारामन यांच्याशी अर्थसंकल्पपूर्व सल्लामसलत करताना, उद्योगपतींनी आणि संघटनांनी सरकारला उत्पन्नाच्या स्लॅबच्या खालच्या टोकाला आयकरात सवलत, उत्पादन लिंक्ड इन्सेंटिव्ह (पीएलआय) सारख्या रोजगारावर आधारित प्रोत्साहन योजना सुव्यवस्थित करण्यासाठी आणि व्यवसाय करण्याच्या सुलभतेला प्रोत्साहन देण्याची विनंती केली.

भारतीय अर्थव्यवस्थेचा कणा आणि मुख्य रोजगार निर्माण करणार्‍या सूक्ष्म, लघु आणि मध्यम उद्योग क्षेत्राला चालना देण्यावरही उद्योगपतींनी आणि संघटनांनी भर दिला.