दाद मागितली आणि २ कोटी ७७ लाख आयकर,दंड झाला माफ !

 

पुण्यातील करदात्याला मिळाला न्याय 

पुणे : बँक खात्यात चुकून आलेल्या आणि परत गेलेल्या रकमेवर आयकर खात्याकडून  लागलेल्या आयकर आणि दंडाविरुद्ध दाद मागितली आणि २ कोटी ७७ लाख आयकर,दंड  माफ झाला ! ही घटना पुण्यातील असून या  करदात्याला  न्याय मिळाला आहे. 

श्री.अरशद पटेल कार्यरत असलेल्या कंपनीकडून त्यांच्या खात्यावर आर्थिक वर्ष २०१५-१६ आकारणी वर्ष २०१६-१७ मध्ये कंपनीने चुकून रु. २,३४,५१,०००/- (रु.दोन कोटी चौतीस लाख एक्कावन्न हजार) इतकी रक्कम ट्रान्सफर केली होती.चुक लक्षात येताच  ती रक्कम परत देखील केल्याचे त्यांच्या फॉर्म २६ ए.एस वरुन दिसत होते.परंतु बँकेच्या खात्याद्वारे आयकर विभागाला ही माहिती दिली गेली.आयकर खात्याने रक्कम परत गेल्याची दखल न घेता खात्यात आलेल्या पैशांना श्री.पटेल यांचे उत्पन्न समजून त्यावर आयकर,व्याज आणि दंडासह रु.२,७७,३७०००/- (रु.दोन कोटी सत्त्याहत्तर लाख सदतीस हजार) रुपयांची नोटीस पाठवली.याबाबत आयकर खात्याचा निर्णयाची प्रत नुकतीच पटेल यांच्या हाती पडली आहे.आयकर खात्याला ८ ते १२ वर्षापर्यंत करदात्याच्या खात्यावरील व्यवहारांची चौकशी करण्याचा अधिकार आहे.त्यामुळे पटेल याना पहिली नोटीस २०२३ च्या अखेरीस आली.त्यानंतर त्यांनी कर सल्लागार एड.समीर शेख यांचा सल्ला घेतला.   

 श्री.अरशद पटेल यांच्या तर्फे अॅड.समीर शेख यांनी बाजू मांडून सदर रक्कम चुकून आल्याबाबत खात्री पटवून दिली. त्यामुळे आयकर खात्याने त्यांच्याद्वारे लावण्यात आलेल्या आयकर,व्याज आणि दंडाची एकूण रक्कम रु. २,७७,३७०००/- (रु. दोन कोटी सत्त्याहत्तर लाख सदतीस हजार) रद्द करुन श्री. पटेल यांचे त्या वर्षात जितके नेमके उत्पन्न होते त्यावर कर लावण्याचा निर्णय घेतला.त्यामुळे मोठा आयकर आणि दंडातून त्यांची सुटका झाली.

अचानक मोठी रक्कम खात्यावर जमा झाल्यास काय करावे ?

अचानक मोठी रक्कम खात्यावर जमा होण्याची  घटना नवी नाही.मोठी उलाढाल,अर्थ व्यवहारात अशा गोष्टी होत असतात.मात्र,आपल्या खात्यात अशी मोठी रक्कम जमा झाल्यास ती खर्च करू नये आणि तातडीने आपल्या कर सल्लागाराशी संपर्क साधावा अन्यथा आयकर खात्याकडून दंड आणि व्याज लागू शकतो,असे एड.समीर शेख यांनी सांगितले.तसेच सर्व करदात्यांनी वेळेवर आणि योग्य आयकर विवरणपत्र भरल्यास पुढील त्रास वाचतो,आयकर खात्याला ८ ते १२ वर्षापर्यंत कधीही करदात्याच्या खात्यावरील व्यवहारांची चौकशी करण्याचा अधिकार आहे,असेही त्यांनी सांगितले.