वाचन संस्कृतिच्या संवर्धनासाठी 'पुणे पुस्तक परिक्रमा'

पुणे : राष्ट्रीय पुस्तक न्यास आणि पुणे पुस्तक महोत्सव यांच्या संयुक्त विद्यमाने 'पुणे पुस्तक परिक्रमा' या अभियानाचे उद्घाटन माजी राज्यसभा खासदार डॉ. नरेंद्र जाधव यांच्या हस्ते करण्यात सावित्रीबाई फुले पुणे विद्यापीठात करण्यात आले.

यावेळी कुलगुरु सुरेश गोसावी, प्र-कुलगुरु डॉ. पराग काळकर, कुलसचिव डॉ. विजय खरे, पुस्तक महोत्सवाचे संयोजक राजेश पांडे, सल्लागार समितीचे सदस्य राजशेखर जोशी यांची प्रमुख उपस्थिती होती. मराठी राजभाषा दिनानिमित्त कार्यक्रम आयोजित केला होता.

या उपक्रमाअंतर्गत पुस्तकांची व्हॅन घेऊन शहराच्या विविध भागांत पुस्तकांचे प्रदर्शन आणि विक्री होणार आहे. त्यामुळे वाचनप्रेमींना पुस्तके पाहण्याची, चाळण्याची, वाचण्याची आणि विकत घेण्याची संधी मिळणार आहे. वाचन संस्कृतीचे संवर्धन होण्यासाठी हा अभिनव उपक्रम उपयुक्त ठरेल असे मत डॉ. जाधव यांनी व्यक्त केले.

विद्यार्थ्यांना आणि शहरातील नागरिकांना पुस्तकांच्या स्वरूपात जोडण्यासाठी हा उपक्रम यशस्वी ठरेल असा विश्वास कुलगुरु डॉ. गोसावी यांनी व्यक्त केला.

या उपक्रमाच्या माध्यमातून राष्ट्रीय पुस्तक न्यासाची मराठी, हिंदी आणि इंग्रजी भाषेतील दर्जेदार पुस्तके वाचकांना त्यांच्या परिसरात उपलब्ध होतील. एका पुस्तकाच्या खरेदीवर एक पुस्तक विनामूल्य मिळणार आहे. वाचन संस्कृतिचे संवर्धन करण्यासाठी पुणे पुस्तक महोत्सवाच्या वतीने हाती घेण्यात येत असलेल्या विविध उपक्रमांपैकी हा एक उपक्रम आहे.