भारतीय विद्या भवन -इन्फोसिस फाऊंडेशन तर्फे २७ नोव्हेंबर ते ३ डिसेंबर दरम्यान पुण्यात भव्य 'कथा कीर्तन महोत्सव' !

 

पुणे: महाराष्ट्रातील शेकडो वर्षांच्या  कीर्तन परंपरांचा परिचय आजच्या पिढीला करून देण्याच्या उद्देशाने भारतीय विद्या भवन व इन्फोसिस फाउंडेशन यांच्या वतीने दि. २७ नोव्हेंबर ते ३ डिसेंबर या सप्ताहामध्ये भव्य 'कथा कीर्तन महोत्सवाचे' आयोजन करण्यात आले आहे. या सप्ताहामध्ये दररोज सायंकाळी सहा वाजता विविध कीर्तन परंपरांचे सादरीकरण होणार आहे. त्यात पारंपरिक वारकरी कीर्तन, नारदीय कीर्तन, रामदासी कीर्तन व राष्ट्रीय कीर्तन अशा विविध परंपरांचा समावेश आहे. 

भारतीय विद्या भवन पुणे केंद्राच्या  अध्यक्षा श्रीमती लीना मेहंदळे,मानद सचिव नंदकुमार काकिर्डे यांनी पत्रकाद्वारे ही माहिती दिली.  

या कीर्तन सप्ताहाचा प्रारंभ सोमवार, दि. २७ नोव्हेंबर रोजी ,सायंकाळी ६ वाजता  भारतीय वारकरी मंडळाचे अध्यक्ष  संदीप महाराज पळसे व त्यांच्या सहकाऱ्यांच्या पारंपरिक वारकरी कीर्तनाने(विठ्ठल रुक्मिणी कथा) होणार आहे. या महोत्सवाचे उद्घाटन इन्फोसिसच्या विकास केंद्राचे ( डेव्हलपमेंट सेंटर) पुणे विभागाचे प्रमुख प्रवीण व्ही.कुलकर्णी ,रजनीश मालविया यांच्या हस्ते ,ज्येष्ठ पुरातत्वतज्ज्ञ डॉ.गो.ब.देगलूरकर, संत साहित्याचे जेष्ठ अभ्यासक डॉ. सदानंद मोरे ,के.जी.रंगनाथन,नागलक्ष्मी राव,लीना मेहेंदळे यांच्या उपस्थितीत होणार  आहे.

 मंगळवार, दि. २८ नोव्हेंबर रोजी ,सायंकाळी ६ वाजता देहू येथील ह .भ. प. आचार्य वैभव महाराज राक्षे यांचे  पारंपरिक वारकरी कीर्तन(भक्त प्रल्हाद कथा )  होणार आहे. बुधवार, दि. २९ नोव्हेंबर रोजी,सायंकाळी ६ वाजता कीर्तन स्वर मंजुषा श्रीमती अंजली कऱ्हाडकर  व त्यांची कन्या शिवानी कऱ्हाडकर  या माय - लेकींच्या "कीर्तन संवादाद्वारे " (पुरंदर दास कथा )तिसऱ्या  दिवशीचे पुष्प गुंफले जाणार आहे. गुरुवार दि.३० नोव्हेंबर रोजी,सायंकाळी ६ वाजता कीर्तन विशारद  श्रेयस संजय कुलकर्णी यांच्या  नारदीय कीर्तनाने सप्ताहातील चवथे पुष्प गुंफले जाणार आहे. सप्ताहातील पाचवे पुष्प शुक्रवार, दि. १ डिसेंबर रोजी,सायंकाळी ६ वाजता कीर्तनचंद्र  श्रेयस बडवे व किर्तन चंद्रिका सौ मानसी बडवे  पती-पत्नीच्या " कीर्तन जुगलबंदीने" गुंफले जाणार  आहे. या मालिकेतील सहावे पुष्प शनिवार ,दिनांक २  डिसेंबर रोजीसायंकाळी ६ वाजता ज्येष्ठ  कीर्तनकार चारुदत्त  आफळे यांच्या राष्ट्रीय कीर्तनाने गुंफले जाणार आहे.

महोत्सवाच्या  अखेरच्या दिवशी म्हणजे रविवार, दि. ३ डिसेंबर रोजी सकाळी १०  ते १२ दरम्यान " कीर्तन परंपरा - काल, आज व उद्या" या महत्त्वाच्या विषयावर परिसंवाद होणार आहे. यामध्ये संत साहित्याचे ज्येष्ठ अभ्यासक डॉ. सदानंद मोरे, ज्येष्ठ माध्यम तज्ञ  प्रा.डॉ. विश्राम ढोले,  तत्वज्ञान व प्राच्य विद्या यांचे अभ्यासक व  संशोधक डॉ. प्रणव गोखले सहभागी होणार असून ह .भ. प. प्रा. अभय टिळक हे परिसंवादाचे सूत्रसंचालन करणार आहेत. याच दिवशी सायंकाळी सहा वाजता  कीर्तन महोत्सवाचा समारोप होणार आहे. यावेळी प्रारंभी ६ वाजता भारतीय विद्या भवनच्या अध्यक्षा श्रीमती लीना मेहंदळे यांचे  "महाभारतातील किर्तन परंपरा"  यावर व्याख्यान होणार असून त्यानंतर  ठाणे येथील युवा कीर्तनकार अमेय बुवा  रामदासी यांचे रामदासी कीर्तन सादर होणार आहे. 

भारतीय विद्या भवनच्या सेनापती बापट रस्त्यानजीकच्या  सरदार महादेव बळवंत नातू  सभागृहामध्ये या कीर्तन महोत्सवाचे आयोजन करण्यात आले आहे.  पुणे शहर व जिल्ह्यातील कीर्तन महाविद्यालयाचे विद्यार्थी, अभ्यासक, रसिक यांनी उपस्थित राहावे असे आवाहन भारतीय विद्या भवन तर्फे करण्यात आले आहे.प्रवेश मोफत आहे.