हिंजवडीच्या वाहतूक समस्येवर आमदार शंकर जगताप यांच्या मागणीनंतर मुख्यमंत्र्यांकडून तातडीचे आदेश, उच्चस्तरीय बैठकीत महत्त्वाचे निर्णय

 

हिंजवडीच्या वाहतूक समस्येवर कायमस्वरूपी तोडगा; पर्यायी रस्ता, नवीन मेट्रो मार्ग आणि 'सिंगल पॉईंट ॲथॉरिटी'ची घोषणा

डिसेंबर २०२५ पर्यंत हिंजवडी मेट्रो सुरू करण्याचे निर्देश; लक्ष्मी चौक पूल सहापदरी होणार

मुंबई, १० जुलै २०२५: हिंजवडी आयटी पार्क परिसरातील वाढती वाहतूक कोंडी, अपुरी पायाभूत सुविधा आणि प्रशासनातील समन्वयाचा अभाव यामुळे त्रस्त झालेल्या हजारो आयटी कर्मचारी आणि रहिवाशांसाठी एक दिलासादायक बातमी आहे. या गंभीर समस्यांकडे विधानसभेत लक्ष वेधत आमदार शंकर जगताप यांनी केलेल्या मागणीनंतर, मुख्यमंत्री देवेंद्र फडणवीस यांच्या अध्यक्षतेखाली आज (१० जुलै) मुंबईत उच्चस्तरीय बैठक आयोजित करण्यात आली. या बैठकीत वाहतूक, मेट्रो, रस्ते आणि पायाभूत सुविधांबाबत अनेक निर्णायक निर्णय घेण्यात आले.

३० मीटर पर्यायी रस्ता व नवीन मेट्रो मार्गिकेला मंजुरी: 

आमदार शंकर जगताप यांनी विधानसभेत सूर्य हॉस्पिटलपासून वाकडमार्गे हिंजवडी फेज ३ पर्यंत PMRDA हद्दीतून ३० मीटर रुंदीचा पर्यायी रस्ता आरक्षित करून विकसित करण्याची मागणी केली होती. या रस्त्यामुळे सध्याच्या मुख्य मार्गावरील ५० टक्क्यांहून अधिक वाहतूक वळवता येईल आणि कोंडीचा कायमस्वरूपी प्रश्न सुटेल, असे त्यांनी स्पष्ट केले. मुख्यमंत्री देवेंद्र फडणवीस यांनी या मागणीला तात्काळ सकारात्मक प्रतिसाद देत, PMRDA आणि पिंपरी चिंचवड महापालिका यांना रस्ता आरक्षित करून लवकरात लवकर विकसित करण्याचे स्पष्ट निर्देश दिले.

यासोबतच, निगडी मुकाई चौक–वाकड–नाशिक फाटा–चाकण या मार्गासाठी नवीन मेट्रोचा DPR (सविस्तर प्रकल्प अहवाल) मंजूर करण्याची मागणीही आमदार जगताप यांनी केली, ज्यावर मुख्यमंत्र्यांनी सकारात्मक भूमिका घेत हा प्रस्ताव तात्काळ मंजुरीसाठी पुढे पाठवण्याचे आदेश दिले.

'सिंगल पॉईंट ॲथॉरिटी'ची घोषणा: 

हिंजवडीमधील अनेक शासकीय विभागांच्या समन्वयाअभावी विकास रखडत असल्याने आमदार जगताप यांनी एकवटलेल्या नियंत्रण यंत्रणेची गरज अधोरेखित केली. यावर मुख्यमंत्र्यांनी ‘सिंगल पॉईंट ॲथॉरिटी’ स्थापन करून सर्व विकासकामे एकाच छताखाली आणण्याची महत्त्वपूर्ण घोषणा केली.

मुख्यमंत्र्यांचे प्रशासनाला स्पष्ट आदेश: 

मुख्यमंत्री फडणवीस यांनी या बैठकीत पुढील महत्त्वाचे निर्देश दिले:

• सिंगल पॉईंट ॲथॉरिटीद्वारे सर्व विकासकामांमध्ये समन्वय साधणे.

• ३० मीटर पर्यायी रस्ता तात्काळ विकसित करणे.

• डिसेंबर २०२५ पर्यंत हिंजवडी मेट्रो मार्ग सुरू करणे.

• लक्ष्मी चौक पूल सहापदरी करणे.

• पार्किंग व वाहतूक नियंत्रणासाठी तांत्रिक उपाययोजना करणे.

• पुनावळे, ताथवडे, भूमकर चौक येथील अंडरपासचे काम सुरू करणे.

आमदार शंकर जगताप यांच्या सातत्यपूर्ण मागणीनंतरच ही उच्चस्तरीय बैठक आयोजित करण्यात आली आणि हिंजवडीच्या विकासासाठी अनेक निर्णायक निर्णय घेतले गेले, असे म्हटले जात आहे.

या महत्त्वपूर्ण बैठकीला उपमुख्यमंत्री अजित पवार, राज्यमंत्री माधुरी मिसाळ, आमदार शंकर जगताप, शंकर मांडेकर, महेश लांडगे यांच्यासह नगरविकास विभागाचे अपर मुख्य सचिव असिमकुमार गुप्ता, प्रधान सचिव गोविंदराज, विभागीय आयुक्त चंद्रकांत पुलकुंडवार, जिल्हाधिकारी जितेंद्र डुडी, पुणे मनपा आयुक्त नवलकिशोर राम, पिंपरी चिंचवड मनपाचे आयुक्त शेखर सिंह, पुणे महानगर विकास प्राधिकरण आयुक्त योगेश म्हसे, जिल्हा परिषद मुख्य कार्यकारी अधिकारी गजानन पाटील, उद्योग विकास आयुक्त पी. वेलारासू यांच्यासह विविध विभागाचे अधिकारी आणि आयटी फोरम, सोसायटी फेडरेशन, #UnclogHinjawadiITPark मोहिमेतील प्रतिनिधी, हिंजवडी एम्प्लॉईज अ‍ॅण्ड रेसिडेन्ट ट्रस्ट, मुळशी को-ऑपरेटिव्ह हौसिंग सोसायटी फेडरेशनचे शिष्टमंडळ उपस्थित होते.